دنیا دا معاشی نظام تباہی دے کنڈے تے ہے: آئی ایم ایف
وچار ڈیسک
October 12th, 2008
انٹرنیشنل مانیٹری فنڈ (آئی ایم ایف) نے آکھیا ہے کہ قرضیاں دا وپار کرن والے بینکاں نے دنیا دے معاشی نظام نوں تباہی دے کنڈے لیا کھڑا کیتا ہے تے دنیا دیاں امیر قوماں حالے تیکر لوکائی دا وساہ بناؤن وچ ناکام رہیاں ہین۔
امریکہ نے اپیل کیتی ہے کہ دنیا کجھ صبر کرے تے عالمی آگو معاشی منڈیاں نوں سدھارن لئی بھج نس کر رہے ہین۔ پر آئی ایم ایف دا آکھنا ہے کہ آؤن والے مہینیاں وچ ہور بڑا کجھ کرنا لوڑیندا ہے۔ آئی ایم ایف دے پردھان ڈومنک سٹرس نے آکھیا ہے کہ امریکہ اتے یورپ دے وڈے بنکاں دے ڈُبن نال دنیا دا معاشی نظام ڈھین کنڈے اپڑ گیا ہے۔
امریکی پردھان بُش نے ست ملکاں دے اکٹھ (جی سیون) دے پردھان، آئی ایم ایف اتے عالمی بینک دے پربندھیاں نال گل بات وچ آکھیا ہے کہ دنیا دیاں وڈیاں قوماں نوں ایس اوکھت دا پتہ ہے تے اوہ ایہدے نال نبڑن دا جتن کر رہیاں ہین۔ بُش نے آکھیا "مینوں پک ہے کہ دنیا دیاں وڈیاں معیشتاں ایس اوکڑ وچوں نکل آؤن گیاں۔ اوہنے دسیا کہ امریکہ ست سو بلین ڈالر دے بیل آؤٹ پلان نوں چھیتی توں چھیتی لاگو کرن دا جتن کر رہیا ہے۔
بُش دا آکھنا سی "نتیجہ راتوں رات نہیں نکلیا کردا۔ اہناں جتناں دا اثر ہوون وچ ویلا لگے گا۔ اہناں جتناں نال ساڈیاں منڈیاں تے مالیاتی اداریاں دا وساہ بجھ جاوے گا۔" امریکی خزانے دے سیکریٹری ہنری پالسن دا آکھنا ہے کہ دنیا دے معاشی نظام نوں اجوکا خطرہ پہلوں کدی ویکھن وچ نہیں آیا سی۔
