ورلڈ بینک دے پردھان رابرٹ زولیک نے کہیا ہے جو عالمی مالیاتی بحران بندیاں دی آپے سہیڑی ہوئی مصیبت ہے تے عالمی مالیاتی ادارے ایس بحران وچ ترقی پذیر ملکاں دی مدد کرن گے۔واشنگٹن وچ آئی ایم ایف دے پردھان سڑاس پریس کانفرنس نال خطاب کردیاں ہوئیاں ورلڈ بینک دے پردھان نے کہیا دنیا دے مالیاتی بازار وچ بھڑتھو پئے ہوئے ہین تے ترقی پذیر ملک خوراک تے توانائی دیاں قیمتاں وچ بے پناہ وادھے دے کارن پہلوں ہی اوکڑ دا شکار ہین تے جے مالیاتی اداریاں ولوں قرضیاں دینے بند کردتے گئے یاں ایہدے وچ گھاٹ کر دتی گئی تے ایہہ بحران بوہت بھیڑی شکل پھڑ سکدا ہے۔
اوہناں کہیا اجوکا مالیاتی بحران بندیاں دی اپنی سہیڑی ہوئی مصیبت ہے تے ایس وخت توں نکلن دا راہ وی بندیاں دے ہتھ ہے۔ اوہناں نے کہیا جدوں مالیاتی بحران ساہمنے آیا تے امریکہ تے یورپ وچ لوک پہلوں چھچھو پنج وچ پئے پھیر ایہہ چھچھو پنج غصے وچ بدلیا تے پھیر خوف وچ بدل گیا۔'
دوجے پاسے یورپی ملکاں وچ مالیاتی بحران ودھدا جا رہیا ہے تے برطانیہ نے اپنے چار وڈے بینکاں وچ سینتی ارب پاؤنڈ دے اثاثے خریدن دا فیصلہ کر لیا ہے۔ برطانوی بینکاں وچ اثاثے خریدن دا فیصلہ اتوار نوں یورپی ملکاں دی پیرس وچ ہوون والی پردھان کانفرنس توں مگروں کیتا گیا جیہدے وچ مالیاتی بحران نال نبڑن لئی یورپ دی سانجھی حکمت اپناون دا فیصلہ کیتا گیا۔
عالمی آگواں دی مالیاتی بحران نال نبڑن دیاں کوششاں دا ایشیائی حصص بازاراں وچ رلیا ملیا عمل رہیا ہے۔
آسٹریلیا، ہانگ کانگ جنوبی کوریا تے سنگا پور دیاں سٹاک مارکیٹاں وچ سویرے دے کاروبار وچ شیئرز اُتے رہے پر تائیوان تے شنگھائی دیاں اہم مارکیٹاں وچ تھلے رہیاں۔ ٹوکیو دی منڈی چھٹی دے کارن بند رہی۔
یورپی یونین دے آگواں نے کہیا ہے جو کسے وی وڈے بینک نوں ناکام نہیں ہوون دیواں گے۔ یورپی یونین دے یورو بلاک دے چوداں آگواں تے برطانوی وزیر اعظم گورڈن براؤن نے پیرس وچ اتوار نوں ہوون والے پردھان اجلاس وچ عالمی مالیاتی بحران نال نبڑن لئی اک نویں منصوبے تے ایکا کیتا ہے۔
یورپی یونین دے آگواں نے اعلان کیتا ہے جو اوہناں نوں آس ہے اوہ ہور حکومتی کاروائیاں نال بینکاں نوں قرضہ دیون دی ہلا شیری ہووے گی تے انج بینکاں دے معاملے بحال ہوسکن گے۔
فرانس دے صدر نکولس سرکوزی نے کہیا کہ پندراں یورپی ملکاں دیاں حکومتاں پنج سال لئی انٹربینک نویں قرضیاں دی ضمانت دیون لئی تیار ہو گئیاں ہین۔اہناں آگواں نے کسے خاص رقم دا وعدہ تے نہیں کیتا پر فرانس دے صدر سرکوزی دا کہنا ہے جو اج یعنی پیر نوں سارے رکن ملک اپنے اپنے منصوبیاں دا اعلان کرن گے۔
آسٹریلیا دے وزیر اعظم کیون رڈ نے وی کہیا ہے جو اگلے تن سال تیکر اوہناں دی حکومت سارے بینک ڈپازٹس دی گارنٹی دیوے گی بھاویں اوہ جنے وی وڈے ہوون۔
ہفتے دے اخیر تے جی سیون دے وزیر مالیات نے وی بحران نال نبڑن لئی پنج نکاتی ریسکیو پیکیج دا اعلان کیتا سی۔
