پاکستان دے مرکزی بینک موجب ایس مالی سال دی پہلی سہ ماہی یعنی جولائی توں ستمبر دے وچکار باہرلے ملک وسنیک پاکستانیاں نے اک ارب ستاسی کروڑ ڈالر دا زرمبادلہ پاکستان گھلیا جیہڑا پچھلے سال دے ایسے چر دے مقابلے وچ پنجھی فیصد ودھ ہے۔
اسٹیٹ بینک آف پاکستان ولوں منگل نوں جاری ہوون والے اک اعلامیے موجب کئی ملکاں وچ نوکری کرن والے پاکستانیاں ولوں گھلیاںجاون والیاں رقماں وچ وادھے دا رجحان برقرار ہے تے پچھلے مہینے یعنی ستمبر دے وچکار باہرلے ملک وسنیک پاکستانی ورکراں نے چھیاٹھ کروڑ امریکی ڈالر دی رقم ترسیلاں دی شکل وچ پاکستان گھلی جیہڑی کسے اک مہینے وچکار ترسیلاں دی شکل وچ وطن موصول ہوون والی سب توں وڈی رقم ہے۔
ایس توں پہلوں کسے اک مہینے دے وچکار ترسیلاں دی مد وچ سب توں ودھ رقم جولائی دو ہزار اٹھ وچ باٹھ کروڑ امریکی ڈالر ملی سی۔ ستمبر دو ہزار ست وچ ملن والی اکونجاہ کروڑ ڈالر دی ترسیلاں دے مقابلے وچ ستمبر دو ہزار اٹھ دے وچکار زر دیاں ترسیلاں وچ چوداں کروڑ ڈالر یاں 27.96 فیصد وادھا ہویا۔
مرکزی بینک موجب ستمبر دو ہزار اٹھ وچکار ستمبر دوہزار ست دے مقابلے وچ دنیا دے تقریبا سارے ملکاں توں زردیاں ترسیلاں دے آون وچ وادھا ہویا ہے۔
باہرلے ملک پاکستانیاں ولوں بوہتے توں بوہتا زرمبادلہ گھلن دے مگروں وی ملکی زرمبادلہ دے ذخیرے بھیڑے حالاں وچ ہین۔ مرکزی بینک موجب ایس ویلے ملک وچ زرمبادلہ دے ذخیرے اٹھ ارب بتی کروڑ ڈالر ہین جیہدے وچوں اسٹیٹ بینک دے کول چار ارب چھیاسی کروڑ ڈالر موجود ہین جدوں کہ ہور بینکاں دے کول تن ارب پنتالی کروڑ ڈالر ہین۔
ایس سال جون وچ زرمبادلہ دے ملکی ذخیرے گیاراں ارب اٹھائی کروڑ ڈالر سن جیہدے وچوں ہن تیکر چواں مہینیاں دے وچکار تن ارب ڈالر دی کمی ہوئی ہے۔
