امریکی پردھان جارج ڈبلیو بُش نے ورھے 2009 لئی 612 بلین ڈالر دے دفاعی بجٹ دے بل تے دستخط کر دتے ہین جدون کہ امریکہ دے بجٹ دا گھاٹا 455 بلین ڈالر تیکر اپڑ گیا ہے۔
2009 دے دفاعی بجٹ وچ عراق اتے افغانستان وچ فوجی آپریشن لئی 70 بلین دے نیڑے رقم رکھی گئی ہے تے آؤن والے بجٹ وچ فوجیاں دیاں تنخواہاں وچ وی تن اعشاریہ نو فیصد وادھا کر دتا گیا ہے تے ایہہ رقم فوجیاں دی بھلیائی دے منصوبیاں تے خرچی جاوے گی۔
دفاعی بجٹ وچ بش دے چڑھدے یورپ وچ میزائل تباہ کرن والے نظام نوں لاؤن لئی وی ٹھکویں رقم رکھی گئی ہے۔ بش دے دفاعی بل تے دستخط کرن توں دو گھنٹے پہلوں اوہناں نوں پینٹاگون وچ جانکاری دتی گئی۔ پینٹا گون دی بلار ڈانا پرینو نے دسیا ہے کہ بش اتے اوہدی فوجی ٹیم وچکار ایہہ عام جہی ملنی سی جیہدے وچ افغانستان اتے عراق دے جنگ بارے وچار وٹاندرہ ہویا۔
دوجے پاسے ستمبر وچ مُکن والے 2007-2008 دے مالی ورھے وچ امریکی بجٹ دا گھاٹا تن گنا ودھ گیا ہے۔ بجٹ گھاٹا 455 بلین ڈالر یاں کل قومی پیداوار دے دو اعشاریہ تن فیصد تیکر اپڑ گیا ہے۔ امریکی خزانے دے وزیر پالسن دا آکھنا ہے کہ مالی منڈیاں وچ بحران پاروں ایس سال بڑھوتری دی در ہور گھٹ جاوے گی۔
