دنیا دیاں وڈیاں وڈیاں کمپنیاں ولوں منافعے دی بے دل کرن والی رپورٹ نوں ویکھدیاں ہوئیاں عالمی کساد بازاری دے خطرے اک وار پھیر ودھ گئے ہین۔ برطانوی وزیر اعظم گورڈن براؤن نے ایس چنتا وچ ایہہ کہہ کے ہور وادھا کر دتا ہے جو بھیڑے معاشی حالاں دے کارن صرف برطانیہ ہی کساد بازاری دا شکار نہیں ہووے گا سگوں دنیا دے بوہت سارے ملک اوہدی لپیٹ وچ آون گے۔
اج بدھ دی سویرے امریکی منڈیاں وچ مندے دا رجحان ویکھیا جارہیا ہے جدوں کہ یورپی منڈیاں وچ سٹاک انڈیکس وچ تن فیصد کمی ہوئی۔ دوجے پاسے ٹوکیو تے ہانگ کانگ وچ کاروبار پنج فیصد دی کمی دے نال بندہویا۔
موجودہ مالی بحران نے چین دی روز ہوون والی معاشی ترقی نوں سست رو کر دتا ہے تے اوتھے وی حکومت مکان دی خرید فروخت دے سلسلے وچ رعایتاں دے رہی ہے۔
ایس مالی بحران نے ساری دنیا وچ لوکاں دی زندگی دی روٹین نوں وی بدلنا شروع کر دتا ہے اُچیچا کھان پین دیاں عادتاں بدل رہیاں ہین۔ پر ایس سلسلے دی سوادی خبر ایہہ ہے جو دنیا دی سب توں وڈی خوراک دی کمپنی میکڈانلڈ نے اج اپنے غیر معمولی منافعے دا اعلان کیتا ہے۔
دوجے پاسے وائٹ ہاؤس نے کہیا ہے جو صدر بش دے کول انج دی کوئی صلاح نہیں ہے جیہدے ہیٹھ دوجا مالی پیکیج امریکی لوکائی نوں دتا جانا ہووے۔
