عالمی بنک نے پاکستان دی معیشت نوں آسرا دیون لئی دتا جاون والا تریہہ کروڑ ڈالر قرضہ روک لیا ہے تے قرضے تے چلن والے پروگرام نوں بند کرن دا اعلان کیتا ہے۔وزارت خزانہ دے اک افسر نے دسیا کہ بین الاقوامی مالیاتی ادارے نے پاکستان لئی منظور ایس پروگرام تے اعتراض کیتا ہویا سی کیوں جو آئی ایم ایف دے خیال وچ ورلڈ بینک نوں انج دا قرضہ کسے وی ملک نوں جاری کرن دا اختیار نہیں ہے۔
عالمی بنک دے ایس فیصلے نال مشیر خرانہ شوکت ترین دے پاکستان نوں دیوالیہ پن توں بچاون لئی جاری کیتے ' پلان بی ' نوں دھکا لگے گا جیہدے ہیٹھ مشیر خزانہ نے سوکھیاں شرطاں تے قرضہ دیون والے غیر ملکی امدادی ادریاں راہیں چار ارب ڈالر اگلے تریہہ دن وچ اکٹھے کرن دا پروگرام بنایا سی۔
پر پاکستانی افسر دا کہنا سی جو اوہناں نوں آس سی کہ پاکستان دے معاشی حالات نوں ویکھدیاں ہوئیاں آئی ایم ایف مخالفت نہیں کرے گا۔ ایہہ تریہہ کروڑ ڈالر وزارت خزانہ دیاں اوہناں آساں دی لسٹ ' وش لسٹ ' وچ رلتی سن جنہاں ہیٹھ اگلے کجھ ہفتیاں وچکار پاکستان نوں ڈیڈھ توں دو ارب ڈالر عالمی بینک توں ملن دی آس سی۔
