جرمنی دے وزیر خارجہ فرینک والٹر شٹائن مائر نے کہیا ہے جو پاکستان نوں اُکا کجھ دناں وچ ارباں ڈالر دے غیر ملکی قرض چاہی دے ہین۔ پاکستان وچ سینئر پربندھیاں نال ملنی توں مگروں اوہناں کہیا پاکستان دے کول آئی ایم ایف توں قرضہ لین توں وکھ کوئی راہ نہیں ہے۔
مسٹر شٹائن مائر دا کہنا سی جو پاکستان نوں ایہہ قرض مسلسل ودھدے بحران لئی چاہی دا ہے۔ اقتصادی ماہراں دا کہنا ہے جو پاکستان نوں اپنی معیشت نوں استحکام دیون لئی اگلے چویہہ مہینیاں وچ پندراں ارب ڈالر توں ودھ قرضے چاہی دے ہوون گے۔
اہناں ماہراں دا کہنا ہے جو ایہدے لئی سب توں چنگا طریقہ ایہہ ہے جو پاکستان نوں مسلسل مالی مدد تے زراعت صنعت تے توانائی دے شعبے وچ سرمایا کاری ہووے۔ ایس سلسلے وچ پاکستانی وزیر خارجہ شاہ محمود قریشی دے نال سانجھی پریس کانفرنس نال خطاب کردیاں ہوئیاں مسٹر شٹائن مائر نے کہیا ہے "مینوں آس ہے جو ایس سلسلے وچ آئی ایم ایف دا فیصلہ چھیتی ہو جاوے گا۔ کیوں جو ایہہ معاملہ مہینے یاں چھ ہفتے دا نہیں، چھ دن دا ہے۔"
اوہناں کہیا اوہناں دا ملک ایس سلسلے وچ آئی ایم ایف نال گل بات وچ پاکستان دی مدد کرے گا۔
