خزانے دے مشیر شوکت ترین نے آکھیا ہے کہ حکومت نے اجوکا بجٹ غلط بنایا ہے تے ایہہ سارا جھوٹھ ہے۔ اوہناں آکھیا کہ اقتصادی بحران دو ورھیاں تیکر قابو نہیں آ سکدا۔ ایس بحران دے ذمے وار شوکت عزیز، ڈاکٹر سلمان شاہ اتے عمر ایوب ہین۔ اوہناں نوں پچھ پرتیت لئی سدیا جاوے۔
اوہناں نے ایہہ گلاں فوزیہ حبیب دی پردھانی وچ بنی قومی اسمبلی دی قائمہ کمیٹی برائے خزانہ دے اکٹھ وچ آکھیاں۔ خزانے دے مشیر شوکت ترین نے آکھیا کہ حکومت نوں نومبر وچ چار توں پنج ارب ڈالر چاہیدے ہین تے دو ورھیاں وچ دس ارب ڈالر دی لوڑ ہے۔
اوہناں دسیا کہ آئی ایم ایف سودی در ودھاؤن لئی آکھ رہیا ہے پر اسیں حالے ایہدے لئی تیار نہیں ہاں۔ شوکت ترین نے اقتصادی بحران نوں قابو کرن لئی 9 نکاتی ایجنڈہ پیش کیتا جیس وچ اقتصادی سودھاں اتے خرچیاں وچ گھاٹا رلتی ہے۔
مشیر خزانہ نے آکھیا کہ پچھلے چھے مہینیاں وچ غیر قانونی طور تے 10 ارب روپیہ ملک توں باہر گیا ہے۔ شوکت ترین موجب پاکستان دا کل قرضہ ست ٹریلین ڈالر تیکر اپڑ گیا ہے جیہدے وچ 45 ارب ڈالر غیر ملکی قرضہ ہے۔ اوہناں آکھیا کہ پاکستان دے کئی اداریاں دا کوئی کم نہیں تے اوہناں وچ فضول پیسہ روڑھیا جا رہیا ہے۔
