باراک اوباما دے صدر چون ہوون دے دوجے دیہاڑ امریکہ دے حصص بازار وچ پھیر مندی ویکھن وچ آئی۔نیویارک حصص بازار دا ڈاؤ جونز انڈسٹریل ایوریج انڈیکس وچ پنج اعشاریہ دو فیصد کمی ویکھن وچ آئی تے انڈیکس چار سو چھیانوے پوائنٹس دی کمی توں مگروں نو ہزار اک سو اُنتی تے بند ہویا۔
منگل دے دیہاڑے ووٹنگ شروع ہوندیاں ہی ڈاؤ جونز انڈیکس وچ تن اعشاریہ تن فیصد وادھا ویکھن وچ آیا سی تے انڈیکس تن سو پنج اعشاریہ پنج پوائنٹس دے وادھے دے نال نو ہزار چھ سو پنجھی اعشاریہ تن تے بندہویا سی۔
بدھ نوں حصص بازار وچ مندی اک انج دے موقعے تے ویکھن وچ آئی ہے جدوں کمزور معاشی حساب کتاب ایس گل ول اشارہ کر رہے ہین جو جنوری وچ ساہمنے آون والے نویں پربندھیاں نوں بھیڑے معاشی چیلنجاں دا ساہمنا کرنا پوے گا۔
ایس حساب کتاب وچ اک انج دی رپورٹ وی شامل ہے جیہدے نال ایس گل دا پتہ لگدا ہے جو امریکی سروس سیکٹر وچ اکتوبر دے مہینے وچ شرح نمو منفی وچ رہی۔ انسٹی ٹیوٹ آف سپلائی مینیجمنٹ دے سروس سیکٹر ولوں انڈیکس وچ اکتوبر دے مہینے وچ چوتالی اعشاریہ چار فیصد کمی ویکھن وچ آئی جدوں کہ ستمبر وچ ایہہ کمی پنجاہ اعشاریہ دو فیصد رہی سی۔ ماہراں موجب ایہہ سن اُنی سو بیاسی توں لے کے ہن تیکر ایس انڈیکس وچ ویکھی جاون والی بھیڑی کمی ہے۔
بھیڑی معاشی صورت حال دے نال نال امریکی حصص بازار دے سرمایہ کاراں وچ ایس گل تے وی تجسس پایا گیا کہ نویں چنے ہوئے صدر باراک اوبامہ دی ہستی نوں خزانے قلمدان سونپ دے ہین۔سارے دن دی ٹریڈنگ دے وچکار جنہاں کمپنیاں دے حصص دی قدر وچ سب توں بوہتا کمی ویکھن وچ آئی تے مالیاتی ادارے سٹی گروپ، انشورنس کمپنی اے آئی جی تے بینک آف امریکہ ہین۔
دوجے پاسے سینیٹر باراک اوباما دے صدر چون ہوون دے نال ہی ایشیا دی بازار حصص وچ بہتری ویکھن وچ آئی۔ جاپان دی نکئی مارکیٹ چار فیصد توں ودھ وادھے دے نال بند ہوئی جدوں کہ ہانگ کانگ دی مارکیٹ پنج فیصد توں ودھ تے سنگا پور دی مارکیٹ چار فیصد توں ودھ وادھے دے نال بند ہوئیاں۔
ایس توں وکھ ہور کرنسیاں دے مقابلے وچ ڈالر دی قدر چنگی ہوئی ہے۔ منگل دے دیہاڑے وی ایشیاء تے یورپ دے حصص بازاراں وچ وی ایس آس تے تیزی ویکھن وچ آئی کہ نویں چنے ہوئے امریکی صدر حالیں مالیاتی بحران نوں حل کرن لئی نویاں کاروائیاں کرن گے۔
