آئی ایم ایف نے کہیا ہے جو اگلے ورہے ساری دنیا وچ اقتصادی کساد بازاری اوہدے پچھلے گویڑاں توں ودھ ہووے گی تے ترقی کیتے ہوئے ملکاں دیاں معیشتاں صرف صفر اعشاریہ تن فیصد دی رفتار نال ترقی کرن گئیاں۔ انٹرنیشنل مانیٹری فنڈ دے جاری کیتے ہوئے ورلڈ اکنامک آؤٹ لک وچ دسیا گیا ہے جو عالمی پدھر تے مالیاتی بحران دے ہور ودھن نال پچھلے کجھ مہینیاں وچکار معاشی شرح نمو وچ وادھے دیاں آساں ہور گھٹ گئیاں ہین۔
سال دو ہزار نو وچ ترقی کیتے ملکاں وچ معیشت اعشاریہ تن فیصد دی شرح نال ترقی کرے گی جیہڑی کہ دوجی عالمی جنگ دے مگروں سب توں گھٹ پدھر ہے۔ مالیاتی بحران دے کارن مارکیٹس گراوٹ دا شکار ہین تے ایہہ اثاثیاں دی مالیت وچ کمی تے سرمایا کاراں دا اعتماد گنوان ورگے مسئلیاں دا شکار ہین۔
رپورٹ وچ دسیا گیا ہے جو عالمی پدھر تے جی ڈی پی دو فیصد توں ودھ رہوے گا پر یورپ تے امریکا دی معیشت وچ بھیڑی سستی ویکھی جاسکدی ہے۔ آئی ایم ایف موجب دنیا دی سب توں وڈی معیشت امریکا وچ جی ڈی پی اعشاریہ ست فیصد رہن دی آس ہے جدوں کہ یوروون دی معیشت وچ ترقی دی شرح اعشاریہ دو فیصد توں وی گھٹ رہن دی آس ہے۔ ایشیائی خطے وچ معیشتاں نوں عالمی پدھر تے توانائی تے ہور جنساں دیاں قیمتاں وچ کمی دے فیدے ہوون گے تے معاشی شرح نمو اعشاریہ چھ فیصد کمی توں مگروں ست اعشاریہ اک فیصد رہن دی آس ہے۔ چین دی معیشت ساڈھے اٹھ فیصد تے ہندوستان وچ چھ اعشاریہ توں تن فیصد دی شرح نال ترقی کرسکدے ہین۔ رپورٹ موجب عالمی پدھر تے جنساں تیل تے ہور کموڈٹیز دیاں قیمتاں وچ کمی دے کارن روپئے دے کھلار وچ اک فیصد کمی دی آس ہے۔
