وزیر اعظم دے مشیر خزانہ شوکت ترین اجکل پاکستان نوں اک ہور معاشی بحران وچوں کڈھن لئی کوششاں وچ رجھے ہوئے ہین۔ اک پاسے جے اوہ عالمی مالیاتی فنڈ نال نبڑ رہے ہین تے دوجے پاسے اوہ ایہدے چنگل توں بچن دی خاطر سعودی عرب ورگی ظاہر وچ پاکستان دوست حکومتاں ولوں امداد دی آس کر رہے ہین۔
کجھ مبصراں دے خیال وچ عارضی بندیاں تے پنجاں ورہیاں تیکر ملکی معیشت چلاون توں مگروں ہن بھیڑی حالت چنگی کرن لئی پھیر اک ہور گذریل سٹی بینک اہلکار نوں ورتیا جارہیا ہے۔ شوکت عزیز وانگوں شوکت ترین دا پچھوکڑ وچ تعلق سٹی بینک نال رہیا ہے۔ اوہ پاکستان توں وکھ تھائی لینڈ وچ ایس امریکی بینک دے پردھان دے طور تے کم کر چکے ہین۔وزارت داخلہ وانگوں اہم ترین وزارت خزانہ وی ایہہ حکومت اک نہ چنے ہوئے بندے راہیں چلا رہی ہے۔ دوہویں ہی مشیر کابینہ دے ایس ویلے اہم رکن کہے جاسکدے ہین۔
شوکت ترین وی بینکنگ دے کامیاب اہلکاراں وچوں اک ہین۔ اوہناں دا بینکنگ دے شعبے وچ تجربہ چوکھا ہے۔ اوہ یونین ،حبیب تے سٹی بینک دی پردھانی توں وکھ پاکستان بینکس ایسوسی ایشن دی وی اگوائی کر چکے ہین۔ ہور ایہہ ہے جو اوہ کراچی سٹاک ایکسچینج دے وی صدر رہ چکے ہین۔
ایس اعتبار نال اوہناں دا شوکت عزیز وانگوں تجربہ بینکنگ شعبے توں شروع ہو کے گھٹ ودھ ایتھے مک جاندا ہے۔ تے اخیر کیہہ پاکستانی معاشی اوکڑاں دا مُکا کسے بینکر راہیں ہی ہوسکدا ہے یاں اوہدے لئی کسے ہور تجربے دی وی لوڑ ہے؟
اک معاشی ماہر نے تے ایس سوال نوں ذاتی کہہ کے ایہدا جواب دیون توں انکار کیتا۔ اوہناں دا پینترا سی جو ایہہ حکومت دی صوابدید تے ہے جو اوہ جنہوں چاہن وزیر مقرر کرے۔
اُنج ایہہ تے ہر حکومت دی صوابدید تے ہے کہ اوہ جنہوں چاہے وزیر مقرر کرے پر انج دی تقرری لئی ہمیش تجربے نوں وی نظر وچ رکھیا جاندا ہے۔ پر سوال ایہہ ہے جو اک بینکر ہی نوں کیوں چنیا گیا ہے۔ کیہہ اک چنگا معاشی ماہر بوہتا چنگا نہ ہوندا؟
گذریل وزیر خزانہ سرتاج عزیز کہندے ہین جو ظاہر ہے جیہڑے بندے مل سکدے ہین اوہنوں وچوں سب توں چنگے ہوون ایسے لئی اوہناں نوں چنیا گیا۔ اوہناں دا کہنا ہے جو اوہناں دے آون نال معاملے اگے ودھنا شروع ہو گئے ہین۔ ' ہن تیکر تے اوہ ٹھیک چل رہے ہین۔ گھٹو گھٹ ہن کسے بندے دے کول چارج تے ہے ۔'
پر سوال ایہہ ہے جو آیا جیہڑے بینکر ملکی معیشت سدھارن لئی لیائے جارہے ہین اوہناں دا سیاسی قد کاٹھ تے سیاسی قبولیت کنی ہے ؟ ایس ڈی پی آئی دے ڈاکٹر عابد قیوم سولہری کہندے ہین جو نہ تے شوکت عزیز دا سی تے نہ ہی شوکت ترین دا کوئی سیاسی قد کاٹھ نظر آوندا ہے۔
' ایہدے نال کجھ لوکاں دے ذہناں وچ سوال اٹھ رہے ہین کہ جے گذریل صدر پرویز مشرف دیاں ہی پالیسیاں چلانیاں سن تے پھیر ایہہ ساری جدوجہدکیوں کیتی کیتی گئی۔ اک پاسے تے اسیں فروری توں پہلوں حکومت دیاں پالیسیاں نوں موجودہ بحران دا ذمے وار کہہ رہے آں تے دوجے پاسے آئی ایم ایف توں قرضے لئی کیس ایس بنیاد تے تیار کررہے ہین جو پچھلے پنجاں ورہیاں وچ معیشت بڑی چنگی رہی تے عالمی معاشی بحران دے کارن قرضے دے طلب گار آں۔ ایہہ ساڈی قیادت دا پاڑ ہے۔ '
پاکستان وچ بینکنگ دا شعبہ معیشت دے اوہناں شعبیاں وچ شامل ہے جنہے پچھلے کئی سالاں وچ حالات جیویں دے وی رہے ہوون ترقی کیتی ہے۔ اک ادارے نے پچھلے دناں وچ اپنی رپورٹ وچ بینکاں تے اک ' کارٹیل ' راہیں اپنے کھاتے داراں نوں لٹن دا الزام لایا سی۔ کئی لوک پچھدے ہین کہ جدوں معیشت نے ترقی نہیں کیتی تے پھیر بینک کیویں پھل پھُل رہے ہین۔
دوجے پاسے بینکنگ شعبے نال تعلق رکھن والے پچونجاہ سالاں دے شوکت ترین دے ملک دے سب توں وڈے روزی دے وسیلے بارے اوہناں دے پھڈے والے خیالاں تے آپوں پیپلز پارٹی دے وچ وی ناراضی دا وکھالا کیتا گیا ہے۔ سندھ توں پارٹی دے رکناں نے وزیر اعظم دی موجودگی وچ اوہناں دے پینترے دی نکھیندی کیتی کہ زرعی شعبے نوں وی ٹیکس نیٹ وچ شامل کیتا جانا چاہی دا تے ایہہ کہ کسان تے ایس ملک دی ' مقدس گاں '' بنی کھلوتے ہین۔
عام خیال ایہو ہے جو شوکت عزیز تے شوکت ترین ورگے اہلکار بین الاقوامی مالیاتی اداریاں دے دبا ہیٹھ لیائے جاندے ہین تاں جو اوہناں دے ایجنڈے نوں ایہہ اگے ودھا سکن۔ سول سوسائٹی تے اوہناں دے ادارے دے خلاف مہم چلاون والے خادم حسین کہندے نیں جو ایہہ سارا کجھ پچھلے کئی دھاکیاں توں ملک وچ ہورہیا ہے پر ہن اوہ ایسے کارن ایہدے خلاف رولا پارہے ہین کہ ایہہ اک جمہوری حکومت ہے۔ ایسے کارن ایہدے خلاف رولا پارہے ہین کہ ایہہ اک جمہوری حکومت ہے۔' غیر ملکی مالیاتی اداریاں دیاں شرطاں تے کوئی ملک اج تیکر ترقی نہیں کرسکیا ہے '۔
شوکت ترین نوں نویں عہدے تے آئے تقریباََ اک مہینہ ہویا ہے پر حالی تیکر ایہہ سوال وی نہیں پتہ لگ سکیا جو اوہناں دے لائے جاون دا کارن اوہناں دی کاکردگی سی یاں کسے وڈی ہستی یاں بین الاقوامی ادارے دے آکھن تے لایا گیا یاں معاملہ اُکا ذاتی پسند یاں ناپسند دا سی۔
کارن کجھ وی ہووے ایس ویلے ستاراں کروڑ بندیاں دا معاشی مستقبل اوہناں دے ہتھاں وچ دے دتا گیا ہے۔
