جموں کشمیر راہیں وپار دوہاں دیساں نوں نیڑے لیاوےگا

اگست مہینے 1947 نوں ہندوستان دی ونڈ ہو گئی۔ پاکستان دے ناں ہیٹھ اک نویں ریاست دنیا دے نقشے تے ابھری۔ پر ونڈ دے نال ہی اک اجیہا مسئلہ دو دھاری تلوار بن گیا، جس نے دوہاں ملکاں وچکار بھلک وچ بنن والے مٹھڑے سانگیاں وچ زہر گھول دتا۔ ایہو ہی مسئلہ اس خطے دی خوش حالی نوں کھا گیا۔ جویں جھوٹھ تے نفرت رزق نوں کھا جاندی ہے۔ دکھ زندگی نوں کھا جاندے ہن۔

دوواں ملکاں وچکار کئی جنگاں دی اگ وی بھڑکی، جس نے اس خطے نوں بارود دا ڈھیر بنا دتا۔ اس خطے دی ونڈ نوں 60 سال توں ودھ چر لنگھ جان دے باوجود ایہہ مسئلہ حالے وی ننگی تلوار وانگ ساڈے سراں تے لمک رہیا ہے۔ دوریاں، مجبوریاں، غربت، نفرت تے جنگی جنون۔ جے ایہناں ساریاں سوچاں تے جذبات نوں ملا کے اکو ناں دتا جاوے تاں اوہ ناں مسئلہ کشمیر بندا ہے۔ ٹھیک ہے کہ مسئلہ کشمیر اک گنجھل دار معاملہ ہے۔ پر ایہہ تاں اس خطے دی اک ارب توں وی ودھ آبادی نوں اک سزا لگی ہوئی ہے۔ عمراں مکدیاں جا رہیاں ہن پر ایہہ سزا مکن وچ نہیں آ رہی۔ قید توں رہائی وی ہوندی ہے۔ چاہے اوہ عمر قید ہووے۔ راتاں وی آؤندیاں ہن تے دن وی چڑھدے ہن۔ جد سورج ڈھلدا ہے تاں پھیر رات آؤندی ہے، جس دی سیاہی دے سمندر وچ ایہہ جہان ڈب جاندا ہے پر رات دے ہنیریاں اندروں سورج پھیر ابھردا ہے۔ دن دا چانن رات دی سیاہی نوں آپنی بکل وچ لکا لیندا ہے جویں محبت نفرت نوں آپنے اندر جذب کر لیندی ہے۔

کشمیر دے دوواں حصیاں وچکار وپار دا مڈھ بجھ گیا ہے۔ منگلوار 21 اکتوبر والے دن بھارتی کشمیر ولوں 13 ٹرک چکوٹھی راہیں پاکستانی کشمیر وچ آئے تے پاکستانی کشمیر چوں 14 ٹرک انڈین کشمیر گئے۔ پاکستانی کشمیر توں چول، لسن، مسالہ، خشک پھل، جائے نماز، قیمتی پتھر، املی، شہد، کڈھائی سلائی والیاں چیزاں، سبزیاں، پشاوری چپلاں، بھارتی کشمیر بھیجیاں گئیاں۔ جد کہ بھارتی کشمیر توں سیب، کشمیری شالاں، ٹماٹر، دالاں تے خشک میوے پاکستانی کشمیر بھیجے گئے۔ ہندوستان توں آؤن والا وپاری سامان مظفر آباد تے پاکستان ولوں جان والا وپاری سامان سرینگر وچ ویچیا جاوےگا۔ پاکستانی ٹرکاں تے جو وپاری سامان سی، اوہ اڑی تے اسلام آباد وچ لاہیا گیا۔ جد کہ ہندوستانی ٹرک چکوٹھی وچ خالی کیتے گئے۔

پاکستانی، مال بردار ٹرکاں نوں وزیر اعظم پاکستانی کشمیر سردار عتیق احمد نے تے ہندوستان ولوں مال دے ٹرکاں نوں انڈین کشمیر دے گورنر سری ووہرا نے ہری جھنڈی دکھائی۔ اس موقعے تے کنٹرول لائن دے دوویں پاسے سڑک نوں پھلاں تے جھنڈیاں نال سجایا گیا سی۔ بہت وڈی گنتی وچ عام لوک تے سکولاں دے بچے حاضر سن۔ ایہناں لوکاں تے بچیاں نے پاکستان ہندوستان دوستی زندہ باد دے نعر ے لائے۔ آپسی محبت تے میل ملاپ دے گیت وی گائے۔

کشمیر دے دوواں حصیاں وچ وپار دی شروعات 61 سال توں بعد ہوئی ہے۔ ہن آس بجھی ہے کہ خطہ کشمیر دے نال نال پاکستان تے ہندوستان وچکار نفرت، شک تے کھچاؤ نوں دور کرن وچ مدد ملے گی۔ آپسی سانگے دوستانہ بنن گے۔ کشمیر دے دوہاں حصیاں دے آر پار وپار دا فیصلہ ستمبر مہینے 2008 وچ ہویا سی۔ اس وپار نوں دوواں ملکاں وچکار دوستی تے نیڑتا دے سپنے نوں حقیقت دا روپ دین دا ناں دتا گیا ہے تے اس دے نال ایہہ سدھر وی ہے کہ انج کشمیر دے دوواں حصیاں نوں وکھ کردی ہوئی کنٹرول لائن نوں بے معنی کیتا جا سکے گا۔ صرف تجارت ہی نہیں بلکہ دوہاں پاسیاں دے کشمیریاں نوں وی آزادانہ آؤن جان دا رستہ پدھرا ہووےگا۔ لائن آف کنٹرول دے رستے کشمیر دے دوواں حصیاں وچکار وپار دی شروعات دا عام کشمیریاں تے کشمیر دی امن پسند لیڈرشپ ولوں نگھا سواگت کیتا گیا ہے۔ وپار مال نال لدے ٹرکاں دی روانگی ویلے پاکستانی کشمیر دے پردھان منتری نے کشمیریاں دے اک بہت وڈے اکٹھ نوں خطاب کردے ہوئے آکھیا کہ اج دے دن نوں تاریخ وچ سنہری اکھراں نال لکھنا چاہیدا ہے۔ اس تاریخی موقعے تے پرنٹ تے الکیٹرانک میڈیا دے لوکاں دی وی اک وڈی گنتی حاضر سی۔ وزیر اعظم نے آپنی تقریر وچ آکھیا کہ آر پار دے وپار دی راہ وچ حالے کجھ رکاوٹاں ہن جنہاں نوں چھیتی ہی دور کر دتا جاوے گا۔ اوہناں بڑے جوش نال آکھیا کہ اج دا دؤر گولی دا نہیں دوستی دا ہے۔ کشمیر دی کنٹرول لائن دے آر پار وپار نال کشمیر دے دوواں خطیاں نوں اک نویں منڈی مل جاوے گی۔ انج دا ہی امن پسند کشمیریاں دا اک اکٹھ روڑی دے مقام تے وی ہویا جس وچ بھارتی کشمیر دے گورنر، اس توں علاوہ محبوبہ مفتی تے کافی گنتی وچ سیاسی تے وپارک لیڈرشپ نے رلت کیتی۔ گورنر صاحب نے بڑیاں خوشیاں تے چاواں نال وپاری مال والے ٹرک دے قافلے نوں ہری جھنڈی دکھائی۔ دوواں پاسیاں دے کشمیری وپار دی اس شروعات تے بہت خوش ہن تے اس دے نال نال امن تے خوش حالی لئی وی آس وند ہن۔