ہندوستانی وپاری میلے وچ پاکستان دے سٹال سکھنے ای رہے
وچار ڈیسک
November 15th, 2008
ہندوستان وچ ہوون والے عالمی وپاری میلے دے پہلے دیہاڑ ہندوستان ولوں پاکستانی وپاریاں دا مال واہگہ اٹاری بارڈر توں اگے نہ لنگھن دیون کارن سکھنے ای رہ گئے۔
ہندوستان دے نائب صدر حامد انصاری دی پربندھی وچ ہوون والے 14 دیہاڑیاں دے ایس میلے وچ 150 پاکستانی وپاری اپنے مال سنے رلن گے۔ پاکستانی وستاں لئی رکھی تھاں پہلے دن ویہلی ہی رہی۔ پاکستانی وپاری جتھے دے موہری تنویر احمد شیخ نے دسیا کہ اوہناں دے مال دے 40 کنٹینر واہگہ بارڈر تے پچھلے ہفتے توں اجازت ملن دی اڈیک وچ رُکے ہوئے ہین۔
اوہناں دا آکھنا سی کہ "پچھلے تن دیہاڑیاں توں اوہ کدے کسے کول تے کدے کسے کول نس رہے ہین پر ہندوستانی پربندھیاں ولوں اوہناں نوں مال لے جان دی اجازت نہیں مل رہی۔ پاکستانی ہائی کمشنر شاہد ملک دا آکھنا ہے کہ اوہناں نوں ہندوستانی پربندھیاں دے بھیڑے ویہار تے بڑی حیرانی ہے۔
شاہد ملک نے آکھیا کہ ہندوستانی سانوں آکھدے نیں کہ دوہاں ملکاں وچکار وپار ہونا چاہیدا ہے اتے وپار لئی بارڈر کھلنا چاہیدا ہے پر پاکستانی مال نوں نہ لنگھن دینا کھلی منافقت ہے۔ ہندوستانی پربندھیاں نال گل کیتی گئی تے اوہناں آکھیا کہ اوہ چھیتی ہی پاکستانی مال نوں بارڈر توں لنگھن دی اجازت دے دیون گے تاں جو پاکستانی وپاریاں دا مال میلے وچ لگے سٹالاں تے رکھیا جا سکے۔
میلے دے پربندھیاں ولوں جاری ہوون والے کتابچے وچ لکھیا گیا ہے کہ پاکستان دے بنے کپڑے لیڑے اتے ہتھ دیاں بنیاں وستاں لوکاں لئی کھچ دا سبب ہوون گیاں۔ اگے دس دیہاڑیاں وچ آس ہے کہ دس ملین لوک ایس میلے وچ رلتی ہوون گے۔ ایس میلے وچ 38 ملکاں دیاں 7000 کمپنیاں اپنیاں وستاں دی نمائش کرن گیاں۔
