شوگر دے روگی جیہڑے انسولین لاؤندے نیں تے پنڈے وچ سوئیاں چبھو چبھو اک گئے نیں اوہناں لئی اک چنگی خبر ہے کہ اوہ ہن سپرے راہیں وی انسولین لے سکدے نیں۔ ایہہ سپرے مونہہ راہیں پنڈے نوں انسولین پچاوے گی۔
ایہہ سپرے تیاری دے بالکل نیڑے ہے تے چیکنگ دے تیجے مرحلے وچ ہے۔ شروع وچ ایہہ انسولین امریکہ وچ ویچی جاوے گی۔ ایہنوں ہندوستان وچ ویچن دی منظوری وی مل گئی ہے۔ ہندوستانی کمپنی دا آکھنا ہے کہ سانوں ویچن دی منظوری مل گئی ہے تے ہن اسیں ایہدے مُل دی اڈیک وچ ہاں۔ آس ہے کہ دسمبر تیکر ایہہ سپرے ہندوستانی منڈی وچ آ جاوے گی۔
ٹائپ اک تے ٹائپ دو دی شوگر لئی ایہہ سپرے ورتی جا سکدی ہے۔ ایہہ سپرے پھیپھڑیاں راہیں انسولین نوں شریانی نظام تیکر اپراوے گی۔ گویڑ ہے کہ ایہدے اک پیکٹ دا مُل دو ہزار روپیہ ہووے گا تے اک پیکٹ وچ 80 یونٹ انسولین ہووے گی۔
دوا بناؤن والی کمپنی نے ایہہ دوا باراں ورھیاں وچ 240 ملین ڈالر خرچہ کر کے بنائی ہے۔
