سافٹ ویئر دی چوری دی راکھی بارے ادارے بزنس سافٹ ویئر لائنس نے کہیا ہے زمبابوے اوہناں ملکاں وچ رلتی ہے جتھے دو ہزار اٹھ وچ سافٹ ویئر دی چوری ودھی ۔ گروپ ولوں جاری ہوون والی اک رپورٹ وچ کہیا گیا ہے پئی زمبابوے وچ ورتون والے بانوے فیصد سافٹ ویئر چوری کیتے ہوئے نیں جدوں کہ دو ہزار ست وچ ایہہ شرح اکانوے فیصد سی۔
انفارمیشن کمیونیکیشن ٹیکنالوجی دے وزیر نیلسن چامیسا نے ایہدا کارن زمبابوے دی بھیڑی معاشی صورت حال نوں کہیا ہے۔ اوہنان نے کہیا لوکاں دی وڈی گنتری دے کول قنونی سافٹ وئیر خریدن جوگے پیسے نہیں ہین۔ پر اوہناں نے کہیا ایس صورت حال تے قابو پاون لئی کاروائیاں کیتیاں جارہیاں نیں۔
اوہناں نے ایہہ وی کہیا پئی کاپی رائٹ ولوں ملکی قنون نظر ثانی دے عمل توں لنگھ رہے نیں جیہدے مگروں اہناں جرماں دے گناہی بندیاں نال نبڑنا سوکھا ہو جاوے گا۔
مشرق وسطیٰ تے افریقہ دے بزنس سافٹ وئیر الائنس دے چیئر مین ڈیل واٹر مینی دے حوالے نال مقامی اخبار فنانشل گزٹ وچ کہیا گیا ہے پئی سافٹ وئیر دی چوری نال ہر سال زمبابوے دی معیشت نوں محصولات دے سلسلے وچ 40 لکھ ڈالر دا نقصان ہوندا ہے۔
زمبابوے توں مگروں آرمینیا بنگلہ دیش تے جارجیا اوہناں ملکاں وچ رلتی نیں جتھے سافٹ ویئر دی چوری دی شرح نوے فیصد ہے۔ افریقہ دے سب حارن علاقے وچ زمبابوے توں مگروں سافٹ ویئر چوری وچ تراسی فیصد دے نال دوجا نمبر کمیرون دا ہے۔
گروپ نے اپنی رپورٹ وچ کہیا ہے پائریسی نال عالمی پدھر تے صرف سافٹ ویئر انڈسٹری نوں ہی نقصان نہیں چکنا پیا سگوں کسے ملک وچ اک ڈالر دا چوری کیتا ہویا سافٹ ویئر وکن نال اوتھوں دی انفارمیشن ٹیکنالوجی دی سروس تے ونڈھن والیاں کمپنیاں نوں ایہدے مگروں تن توں چار کروڑ ڈالر دا نقصان چکنا پیا ہے۔
