ماہراں موجب مرداں وچ اپنے لائف سٹائل نوں بدلن تے ڈاکٹراں کولوں چیک اپ کروان وچ زنانیاں نالوں ودھ کے جھاکا ہوون پاروں کینسر ہوون دے امکان بوہتے ہو سکدے نیں۔ برطانیہ وچ کینسر بارے کاہڈ توں مگروں ماہراں دا کہنا ہے پئی انج دے کینسر جیہڑے مرد تے زنانیاں دوہواں وچ ہوندے نیں اوہناں وچ زنانیاں نالوں مرداں وچ کینسر ہوون دے سٹھ فیصد تے ایہدے نال اوہناں دے مرن دے ستر فیصد امکان ودھ نیں۔
ماہر کہندے نیں پئی ایہدے بائیلوجیکل کارن تے پتہ نہیں لگے پر ایہہ ایس لئی ہوسکدا ہے کیوں جو زنانیاں اپنی صحت دا بوہتا خیال رکھدیاں نیں۔ ماہراں دسیا پئی مرداں نوں کینسر دے ایس خطرے دے بارے خبردار ہوون دی لوڑ ہے۔
سمجھیا جاندا ہے پئی کینسر دے ادھے توں بوہتے کیساں وچ بماری صرف حیاتی جیون دے انداز وچ بدلیاں لیاون نال ٹالے جاسکدے نیں۔
بریسٹ کینسر تے انج دے کینسر جیہڑے جنس بارے نیں ایہدے وکھ ہور کینسر تے لنگ کینسر مرداں نوں بوہتے ہوسکدے نیں۔ اُچیچا لنگ کینسر کیوں جو مرد زنانیاں نالوں ودھ تماکو پیندے نیں تے لنگ کینسر تماکو پین نال ہوندا ہے۔
نیشنل کینسر انٹیلی جنس نیٹ ورک دے پروفیسر ڈیوڈ فورمین نے کہیا ہے پئی مرداں تے زنانیاں وچ کینسر ہوون دے امکاناں وچ اینا فرق ہوون دا کوئی بائیلوجیکل کارن نہیں ایس لئی اسیں ایہہ فرق ویکھ کے حیران آں۔
اوہناں ہور دسیا پئی مرد تے زنانیاں وچ کینسر ہوون دے ایس فرق نال ایہو کہیا جاسکدا ہے پئی ایہدا وڈا کارن مرداں وچ لائف سٹائل بدلن بارے جھاکا ہے۔ جے مرد اپنے لائف سٹائل بدلن بارے ورتارا بدل لین تے اوہناں وچ کینسر ہوون دے امکان بوہت گھٹ ہوسکدے نیں۔
مینس ہیلتھ فورم دے چیئر مین پروفیسر ایلن وائٹ نے کہیا ہے مرد کئی واری تماکو پین، بوہتا بھار چکن بوہتی شراب پین تے خراب کھانا کھاون نال ہوون والے بھیڑے اثراں بارے گھٹ خبردار ہوندے نیں تے ایہدے نال کینسر ہوون دا ڈر ہور ودھ جاندا ہے۔
حالانکہ اوہناں دا کہنا سی پئی مرد تے زنانیاں وچ کینسر ہوون دے ایس فرق بارے ہور کاہڈ دی لوڑ ہے۔
