سائنسداناں دی نویں کاہڈ موجب جے کسے کولوں کم کروانا ہے تے اوہدے سجے کن وچ گل کیتی جاوے کیوں جو لوک سجے کن وچ کہی گئی گل نوں بوہتا چنگی طرحاں سمجھ سکدے نیں۔ اطالوی کاہڈواں دا کہنا ہے پئی ایہدا کارن ایہہ ہے دماغ دا سجا حصہ جیہڑا معلومات سمجھن وچ بوہتا مدد دیندا ہے سجے کن توں جانکاری لیندا ہے ایہہ کاہڈ آن لائن جرنل وچ چھپی ہے۔
پہلی کاہڈ اک کلب وچ کیتی گئی جتھے اُچی آواز وچ موسیقی لگی ہوئی سی تے دو سو چھیاسی بندے گل بات کر رہے سی اہناں بندیاں نے بہتر فیصد گل بات سجے کن وچ کیتی۔
دوجی کاہڈ وچ کاہڈواں نے کلب وچ وڑھ کے اک سو چھہتر بندیاں دے نیڑے مٹھی آواز وچ بے معنی گل کیتی تے اُڈیکیا پئی ایہہ بندے اپنا سجے یاں کھبے کن گل سنن لئی مڑدے نیں۔ کاہڈواں نے اہناں بندیاں دی توجہ ملن توں مگروں سگریٹ منگے اہناں بندیاں وچوں اٹھونجاہ فیصد نے سجا کن موڑیا تے بتالیاں نے کھبا کن۔
تیجی ریسرچ وچ سائنسداناں نے جان بجھ کے کلب وچ اک سو چھہتر بندیاں دے یاں تے کھبے یاں سجے کن وچ گل کردیاں ہوئیاں سگریٹ منگیا۔ ایس ریسرچ وچ سجے کن وچ گل کرن توں ودھ سگریٹ ملے کھبے نالوں۔
ماہر کہندے نیں جے کسے توں کم کروانا ہے تے بندے دے سجے کن وچ بولو تاں جو ایہہ گل دماغ دے ایس حصے وچ جاوے جتھے جانکاری نوں صحیح سمجھیا جاسکے۔
یونیورسٹی کالج لندن دی پروفیسر سوفی سکاٹ دا کہنا ہے بوہتے بندے بول چال تے زبان نوں دماغ دے کھبے پاسیوں سمجھدے نیں جدوں کہ سجے پاسے توں احساسات نوں سمجھیا جاندا ہے۔ سانوں ایہ فرق عام طور تے اودوں نظر آوندا ہے جدوں لوک فون سجے کن نال لا کے گلاں کردے نیں۔
