اک کھوج توں ایہہ پتہ لگیا ہے پئی وڈی عمر دیاں زنانیاں نوں ایہہ بھلیکھا ہوندا پئی اوہناں دی نیندر مرداں نالوں گھٹ سکون والی ہوندی ہے۔
کھوجی ٹیم نوں ایہہ پتہ لگیا ہے پئی وڈی عمر دیاں زنانیاں نوں اپنی نیندر بارے ایہہ بھلیکھا ہوندا پئی ایہہ اوہناں دے سنگی مرداں نالوں کجھ گھٹ تے گھٹ سکون والی ہوندی ہے جدوں کہ حقیقت وچ اوہناں دی نیندر اوہناں مرداں نالوں چنگی ہوندی ہے۔
ڈچ کھوجیاں دا خیال ہے پئی زنانیاں نوں مرداں توں نیندر دی بہتی لوڑ ہوندی ہے جیہدا تت ایہہ ہوسکدا ہے پئی اک ہی طرحاں دی نیندر مرداں لئی تسلی والی ہووے تے زنانیاں لئی نہ ہووے۔ دی ایرامس میڈیکل سنٹر دی ایہہ کھوج میڈیکل جنرل سلیپ وچ چھپی ہے۔
ایس کاہڈ وچکار اناٹھ توں اناسی سال دے نو سو چھونجاہ بندیاں دی نیندر نوں پرکھیا گیا جنہاں وچوں ادھیاں زنانیاں سی۔ زنانیاں نے کاہڈواں نوں دتے گئے اپنے انٹرویو وچ اپنی نیندر دے کل ویلے نوں کوئی تیرا اعشاریہ دو منٹ گھٹ دسیا۔ اوہناں د ے اپنے بیان موجب اوہناں دی نیندر دا معیار وی اپنے سنگی مرداں توں چار اعشاریہ دو فیصد گھٹ ہے۔
پر جدوں اوہناں دی نیندر دا غیر جانبدار تجزیہ کیتا گیا تے ایہہ گل ساہمنے آئی پئی اصل وچ اوہناں دی نیندر مرداں توں دس منٹ بہتی سی۔ ایہدے نال نال ایہہ گل وی ثابت ہوئی پئی اوہناں دی نیندر دا معیار وی مرداں توں چنگا سی سگوں اوہدے وچ وقفے وی گھٹ سی۔
ایہدے نال نال ایہہ گل وی ساہمنے آئی پئی نیندر بارے زنانیاں دا گویڑ مرداں توں بہتا صحیح سی۔ کاہڈواں موجب ایہہ پاڑ زنانیاں وچ نیندر دیاں دوائیاں دا ورتنا تے گھٹ شراب پین نال ہوسکدا ہے۔ کھوجی ٹیم دے پردھان ڈاکٹر ہیننگ ٹیمیئر دا کہنا ہے پئی اوہناں نوں ایہہ جان کے حیرانی ہوئی زنانیاں مرداں توں ودھ سوندیاں نیں۔
