Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> سائنسی دُنیا >> کجھ دوائیاں نقصان دہ ہو سکدیاں نیں

کجھ دوائیاں نقصان دہ ہو سکدیاں نیں

وچار ڈیسک
March 23rd, 2013

موجودہ تحقیق نال ثابت ہویا اے کہ دنیا بھر وچ سبھ توں زیادہ جس دوا دا استعمال ہوندا اے ایہناں وچ پیڑ روک (Pain Killer) سر فہرست نیں۔ ایہہ گولیاں وقتی آرام پہنچاندیاں نیں جیہناں دے اثرات دیرپا نہیں ہوندے۔ تحقیق نال ثابت ہویا اے کہ ایہہ دوائیاں مختصر آرام دی غرض نال استعمال وچ آندیاں نیں ایس لئی مستقبل وچ ایہدے نال صحت دے خاصے مسائل پیدا ہو سکدے نیں۔ ایہناں دوائیاں دے استعمال نال دل دے امراض تے گردیاں دی خرابی ورگے مسائل دی نشانکاری ہوندی اے۔ ایس نوعیت دیاں 23 دوائیاں دوائیاں دا تجزیا کرناتے پتا چلیا اے کہ جو لوک گوڈیاں دے جوڑاں وچ درد محسوس کردے نیں ایہناں لئی ایہ دوائیاں قدرے بہترین نیں کیوں جے ایہہ اک عام بیماری اے جہدے وچ گھٹ زیادا ہر فرد کسے نہ کسے وقت مبتلا ضرور ہوندا اے۔ فیر وی گھٹو گھٹ درد ہون اتے وی درد گھٹ کرن دیاںدوائیاں دا سہارا لینا کوئی ٹھیک عمل نہیں کیوں جے ایہدے اثرات مستقبل وچ بہت سنگین ثابت ہو سکدے نیں ایس لئی ممکنہ حد تک ایہناں دوائیاں دے استعمال توں پرہیز کرنا چاہیدا اے۔
بروکلی سرطان توں بچاندی اے: پھل گوبھی تے بند گوبھی دی اک قسم بروکلی دے طور تے وی مشہور اے سائنسی تحقیق نے ایہ گل واضح کر دتی اے کہ ہر قسم دی گوبھی کینسر دے اثرات نوں روکن وچ معاون ثابت ہوندی اے۔ جان ہاپکنز یونیورسٹی وچ جاری اک تحقیق وچ ایہہ گل ساہمنے آئی اے کہ گوبھی دے اوہ بیج جہناں وچ اجے کلے پھٹے ہون، وڈی گوبھی دے مقابلے وچ زیادا موثر ہوندے نیں جد کہ دو توں تن دن پرانے کلا پھٹن ہوئے بیج کینسر دیاں رسولیاں نوں ختم کرن وچ مددگار ثابت ہوندے نیں۔ ایہناں کونپلاں وچ وڈی گوبھی دے مقابلے مضر اجزاء وی گھٹ ہوندے نیں۔ اک ماہر دے مطابق بروکلی دے علاوہ ہور سبزیاں، اناج، پھلیاں، تے مغزیات وی کینسر دا مقابلہ کر سکدے نیں جد کہ پھلاں دا استعمال وی مفید رہندا اے۔ ایہناں غذاواں وچ وٹامنز، ریشے تے معدنی نمکیات دا تناسب زیادا ہوندا اے جو کہ کینسر دے جرثومیاں نوں ختم کرن دی صلاحیت رکھدے نیں۔ بروکلی مغربی سبزی دے طور تے جانی جاندی اے۔ ایہدا ذائقہ ساڈے ایتھے دستیاب گوبھی توں مختلف ہوندا اے۔ ایہ سبزی غذائی اعتبار نال نہایت مفید تصور کیتی جاندی اے۔
ٹینشن دا علاج مچھی نال: ذہنی دباء دور حاضر دا اک اہم مسئلہ اے جیہدے توں چھٹکارے لئے ہر دن نویں تحقیق ساہمنے آندی رہندی اے۔ پر نویں تحقیق دے مطابق ذہنی دباء دی حالت وچ مچھی کھا کے کمی کیتی جا سکدی اے۔ سائنسداناں دے مطابق سامن، میکریل تے ہیرنگ ورگیاں روغنی مچھیاں وچ موجود اومیگا تھری سٹریس کیول وچ نمایاں طور تے کمی کر سکدا اے۔ ایسے افراد جو انتہائی درجے دے سٹریس وچ مبتلا ہون اوہناں وچ جارحانہ پن تے جھگڑالو طبیعت وی واضح ہووے، مچھی دے تیل وچ تیار شدہ سپلیمنٹ استعمال کرکے صرف چھے ہفتے وچ بہتری ولے قدم ودھا سکدے نیں۔ آسٹریلین محققین دے مطابق روزانہ چھے گرام مچھی دا استعمال ذہنی دباء وچ کمی کر سکدا اے ایس لئی اوہ لوک جو روزانہ مچھی کھاندے نیں'اوہناں وچ سٹریس لیول کافی گھٹ ہو سکدا اے جو لوک بالکل وی مچھی دا استعمال نہیں کردے ایہناں وچ جارحانہ پن، تے سٹریس لیول نمایاں طور تے ویکھیا جا سکدا اے۔ ایس تحقیق دے مطابق روغنی مچھی انسانی صحت لئی فائدہ مند ہوندی اے ایس لئی روزانہ دی بنیاد اتے ایہنوں خوراک وچ شامل کرنا چاہیدا اے۔
زیادہ بہنا چنگا نہیں: پچھلے کئی سالاں توں کیتے جان والے مشاہدات نے ایہہ ثابت کر دتا اے کہ جو افراد دن دا زیادہ تر حصہ دفتری امور نمٹان وچ گزاردے نیں اوہناں دے لک وچ درد رہن لگدا اے تے صرف درد ای نہیں سگوں ایہناں دے لک دے سائز وچ وادھا ہون لگدا اے۔ ایہہ افراد بہن دے اینے عادی ہو جاندے نیں کہ گھراں اتے وی بہ کے کم نمٹانا ایہناں دا مشغلہ بن جاندا اے۔ ایس تحقیق دے نتیجے اخذ کرن لئی برطانیہ وچ محققین دی اک ٹیم نے اک ہزار توں زیادہ افراد توں انٹرویو لتے، جو دفتری ٹائمبیٹھ کے مکمل کیتے جاندے نیں ایہناں وچ تھوڑی جیہی رد و بدل صحت مند زندگی ول گامزن کر سکدی اے۔ مثال دے طور تے ہور ساتھی ورکرز نال گل بات لئی فون استعمال کرن توں گریز کیتا جاوے۔ جس قدر ممکن ہووے ٹرن پھرن دی کوشش کیتی جاوے، لفٹ دے بجائے پوڑھیاں چڑھ کے دفتر پہنچیا جاوے۔ کھان دے وقفے وچ کھان دے بعد پنج، دس منٹ ٹہل لینا چاہیدا اے ایس طرحاں نیندر دا غلبہ وی نہیں ہوندا تے کھان نال طاری ہون والی سستی ختم ہو جاندی اے۔
نیندر کیوں نہیں آندی: وڈے تے وڈے ہن بچے دی نیندر دی کمی دا شکار ہو رہے نیں اک تازہ کھوج مطابق ہندوستان وچ بچے دوجے ملکاں دی نسبت رات دیر تک جاگدے نیں، جیہدی وجہ توں اوہ نامکمل تے غیر آسودہ نیندر دا شکار بندے نیں۔ امریکا دی سینیٹ جوزف یونیورسٹی دی ڈاکٹر جوڈی منڈل نے اپنی ٹیم دے نال ایہہ نویں تحقیق کیتی اے کہ جیہدے لئی اوہناں نے امریکا، یورپ تے ایشیا دے مختلف ملکاں دے کئی ہزار بچیاں دے سون دے طریقہ کار تے ایہناں دی نیندر دا جائزا لتا۔ ایہ مشاہدہ ثابت کردا اے کہ ایشیائی ممالک دی صورتحال بچیاں دے ذہناں اُتے اثر انداز ہو رہی اے جیہدی وجہ توں اوہ گھٹ نیندر لیندے نیں۔ رات دیر تک فلماں ویکھنا، چیٹنگ کرنا تے موبائل فونز اتے SMS کرنا۔ بچیاں دی چنگی نشوونما لئی چنگی نیندر بہت ضروری اے۔ ایہہ بچے چڑ چڑے تے جارحیت پسند ہو جاندے نیں ایس سلسلے وچ والدین نوں چاہیدہ اے کہ بچیاں دے سوون تے جاگن دے ٹائم ٹیبل اتے نظر رکھن۔
کم زندگی اے: اک تحقیق دے مطابق لمی عمر تک کم کرن والے افراد رعشا ورگیاں بیماریاں توں محفوظ رہندے نیں یعنی ضعیف المری کسے بیماری نوں دعوت نہیں دیندی سگوں جو لوک زندگی دا زیادہ دورانیا ذہنی کم سرانجام دین وچ گزاردے نیں ایہناں دے دماغی خلیات فعال رہندے نیں۔ لندن کنگز کالج دی ایس رپورٹ نے اک ہزار توں زیادہ افراد دے آنکڑیاں دا جائزہ لتا۔ ایس ویلے برطانیہ وچ تقریباً ست لکھ افراد حافظے دی کمزوری دا شکار نیں تے ماہرین دے مطابق 2051ء تک ایہ گنتی 17 لکھ تک پہنچ سکدی اے۔ رعشا توں بچن دا آسان طریقہ ایہو اے کہ ذہنی خلیاں نوں لمے عرصے تک متحرک رکھیا جاوے ایس لئی اہم اے کہ انسان ذہنی طور تے مصروف رہوے۔ ایس ضمن وچ اجے ہور کھوج دی لوڑ اے پر یاد رکھو خالی ذہن شیطان دا گھر ہوندا اے تے اپنے ذہن نوں مثبت کماں وچ صرف رکھو۔
٭٭٭٭٭




Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels