ایس موضوع تے صدیاں توں بحث ہے کہ مرداں تے زنانیاں وچ کیہہ فرق ہے، تے اوہناں دے ورتارے وچ جے کوئی فرق نظر آوندا ہے تے کیہہ اُس دا کارن جسمانی تے حیاتیاتی ہے یا وسیب منڈیاں تے کڑیاں دی سکھلائی انج کردا ہے کہ اوہناں دی ہستیاں دی بڑھوتری وکھرے انداز وچ ہندی ہے؟
اسیں ایس موضوع تے کاہڈ لئی ایس سلسلے وچ دنیا دے چوٹی دے ماہربیرن کوہن نال گل کیتی جیہڑے کیمرج یونیورسٹی دے ڈیولپمنٹل پیتھو سائیکالوجی شعبے وچ پروفیسر ہین تے اوٹزم دے میدان وچ ساری دنیا وچ حرفِ آخر دا درجہ رکھدے ہین۔ اوہناں نے ایس موضوع تے اک ' بیسٹ سیلنگ' کتاب وی لکھی ہے۔
ڈاکٹر سائمن آکھدے ہین جو مرداں تے زنانیاں دے دماغاں وچ حیاتیاتی فرق ہندا ہے۔ اوہناں آکھیا جے میں اک اک لفظ وچ دوہواں دے دماغ نوں بیان کرناں چاہواں تے آکھاں دا جو عورت دا دماغ ' ہم دردی' تے مرد دا دماغ ' تجزیہ'۔
اپنی گل دی وضاحت اوہناں نے انج کیتی کہ زنانیاں دوجے لوکاں تے ماحول نال بوہتا رابطہ رکھنا پسند کردیاں ہین تے اوہناں دی ہستی دا سماجی پہلو مرداں دی نسبت کِتے بوہتا مضبوط ہندا ہے۔ اوہ سوکھیاں ہی چہرے دے تاثرات نوں پچھان لیندیاں ہین تے دوجیاں دی ذہنی حالت نوں مرداں توں بوہتے چنگے طریقے نال سمجھ سکدیاں ہین۔
کیوں جو انسانی سماجیات وچ اظہار دا سب توں وڈا آلہ زبان ہے، ایس لئی زنانیاں بولی دے معاملے وچ وی مرداں توں کِتے اگے ہندیاں ہین۔ ایس دا ثبوت ایہہ ہے جو کاہڈ موجب کڑیاں منڈیاں دی نسبت بوہتا چھیتی بولنا شروع کر دیندیاں ہین، تے زندگی دے دوجے ورہے وچ اوہناں دا ذخیرہ الفاظ اپنی عمر دے منڈیاں توں کِتے بوہتا ہندا ہے۔
ڈاکٹر سائمن آکھدے ہین جو اوہناں دی کاہڈ توں ایہہ وی ظاہر ہویا ایس دے مقابلے تے منڈیاں وچ شیواں دا تجزیہ کرن تے اوہناں دے نظام نوں سمجھن دی کوشش کردے ہین تاں جو ایس تے کنٹرول ہو سکے۔ایس موقعے تے میں پروفیسر ہوراں نوں سوال کیتا کڑیاں منڈیاں دے ورتارے وچ ایس فرق دا کارن اوہناں دی اُچیچی تربیت ہوسکدی ہے۔ پر اوہناں آکھیا اوہناں اک انج دا تجربہ وی کیتا ہے جیس وچ اک دیہاڑ دے نیانے تے نیانیاں رلائے گئے سن۔
اہناں نیانیاں نوں انسانی چہرے دی تے اک مشینی کھڈونے دی تصویر وکھائی گئی۔ نتیجیاں توں پتہ لگیا جو کڑیاں انسانی چہرے نوں بوہتا غور نال ویکھدیاں سن، جدوں کہ منڈے کھڈونے ول بوہتا سواد رکھدے سن،کیوں جو ایہہ نیانے اینے نکے سن کہ اوہناں تے ماحول دا یاں تربیت دا کوئی اثر نہیں ہوسکدا۔ ایس لئی ظاہر ہے دوہواں وچ جیہڑا فرق ہے اوس دی وجہ حیاتیاتی ہے۔
ہن سوال ایہہ پیدا ہندا ہے جو اخیر دماغ وچ ایہہ فرق پیدا کیویں ہندا ہے؟
ڈاکٹر سائمن آکھدے ہین جو ماں دے ڈھڈ وچ پلن والے نیانیاں وچ مردانہ ہارمون ٹیسٹا سٹیرون دی اک اُچیچی مقدار پائی جاندی ہے۔ منڈیاں وچ ایہہ مقدار بوہتی تے کڑیاں وچ گھٹ ہندی ہے۔ ایسے ہارمون دا دماغ تے وی اثر ہندا ہے جیس دی وجہ توں اوہناں دے دماغاں دی نسوانی یا مردانہ خطوط تے نشوونما ہندی ہے۔
ڈاکٹر سائمن اپنی کاہڈ نوں اک قدم اگے ودھا کے نظریہ پیش کردے ہین کہ اوٹزم دا شکار نیانے اصل وچ بوہت مردانہ پن وچ پئے ہندے ہین۔ کیوں جو اوہناں دے دماغ وچ لوڑ توں بوہتا مردانہ ہارمون پایا جاندا ہے ایس لئی اوہناں دی ہستی دا سماجی پہلو اُکا ودھدا پھلدا نہیں ہے۔
ایس دے مقابلے وچ اوہناں لوکاں وچ کسے شے دا نظام سمجھن دی صلاحیت بماری دی حد تیکر پائی جاندی ہے تے اوہ زندگی دیاں عام شیواں وچ وی اینا غیر معمولی سواد ظاہر کردے ہین کہ دنیا مافیا توں وکھ ہوجاندے ہین۔ ایہو کارن ہے جو اوٹزم دے کجھ مریض پوری دی پوری فون ڈائرکٹریاں تے ڈکشنریاں زبانی یاد کرلیندے ہین، پر اوہناں نوں اپنے ساکاں تے ملن والیاں نوں سلام دعا کرنا وی چیتے نہیں رہندا۔
