امریکی کاہڈ موجب کینسر دے مریضاں نوں اپنے خوف بارے لکھن دی ہلاشیری دیون نال اوہناں دی زندگی چنگی ہوسکدی ہے۔ نینسی مورگن نے واشنگٹن وچ کینسر سینٹر وچ اُڈیک دیاں مریضاں تے ایہہ تحقیق کیتی۔اونکولوجسٹ ناں دے جریدے موجب جنہاں نے ایس کاہڈ وچ حصہ لیا اوہناں وچوں ادھے مریضاں دا آکھنا سی جو ایس مرض ولوں جیہڑا خوف سی اوہ لکھ کے اوہناں دی وچار بدلی ہے۔
ایس مرض دے جوان بندے جنہاں نوں حالی ایہہ مرض ہویا ہی ہے ایس لکھائی توں بوہتا فیدا چکن گے۔ ایہہ لکھائی صرف ویہہ منٹ لیندی ہے تے ایس وچ سوال پچھیا جاندا ہے جو ایس مرض نے اوہناںدی زندگی تے کیویں اثر پایا ہے۔
اوہ کینسر دے مریض جنہاں نے ایہہ لکھائی کیتی سی، اوہناں نال کجھ ہفتیاں مگروں پھیر رابطہ کیتا گیا۔ اوہناں وچوں اُنجاہ فیصد دا آکھنا سی جو ایس لکھائی توں مگروں اوہناں دی وچار کینسر بارے بدلی ہے جدوں کہ اڑتالی فیصد دا کہنا سی جو اوہناں نوں کوئی فرق نہیں پیا۔
ایس لکھائی دے سدھے ساہویں معائنے وچکار مریض تے کوئی فرق نہیں پیا پر اوہناں دی وچار تے فرق پیا ہے۔مورگن دا آکھنا ہے جو 'کینسر نال جڑی وچارتے جذبات تے ایس لکھائی نال فرق پیندا ہے تے ایہہ ہور کاہڈاں وچ ثابت ہو چکیا ہے۔ صرف حقیقتاں دے بارے لکھن نال فرق نہیں پیندا'۔
ڈاکٹر بروس چپسن دا آکھنا ہے ' مینوں خشی ہے جو بوہت سارے مریض انج دے علاج وچ سواد لے رہے ہین۔ ساڈی کاہڈ ثابت کردی ہے جو ایس لکھائی نال فیدا ہندا ہے تے کینسر دے مصروف کلینک وچ انج دی لکھائی کرانی چاہی دی ہے'۔
