اک ٹیکنالوجی کمپنی دا آکھنا ہے جو اُس نے ڈسک دیاں نقلاں بناون توں تحفظ دیون والی بلورے ٹیکنالوجی دا توڑ لبھ لیا ہے۔ سلائے سوفٹ ناں دی کمپنی دا آکھنا ہے اوہناں جو اوہناں دے پروگرام ' اپنی ڈی وی ڈی' دا نواں وژن ورتن والیاں نوں ہائی ڈیفنیشن ڈی وی ڈیز دی بیک اپ سیکیورٹی کاپی بناون دیوے گا۔
ایہہ دعویٰ سونی کارپوریشن لئی اک بھیڑی خبر ہے جیہڑی بلورے ٹیکنالوجی دی خالق ہے۔ بلورے اک ہائی ڈیفینیشن ڈسک ہے جیہڑی ڈی وی ڈی دے متبادل دے طور تے تیار کیتی گئی ہے۔ ایس ٹیکنالوجی وچ بی ڈی ڈی پلس ناں دے اک نظام راہیں ڈسک نوں محفوظ بنایا جاندا ہے تاں جو کوئی ایس دی نقل نہ بنا سکے۔
پچھلے ورہے جدوں بلورے ٹیکنالوجی تیار کیتی گئی سی تے اوہنوں بناون والیاں نے دعویٰ کیتا سی کہ دس ورہیاں تیکر کوئی ایس دا توڑ نہیں لبھ سکے گا۔ سونی کارپوریشن نے ایس خبر تے تبصرہ کرن توں انکار کر دتا ہے۔ سلائے سوفٹ دا آکھنا ہے جو اوہناں نے نومبر دو ہزار ست وچ بی ڈی پلس نوں ہیک کر لیا سی۔
بی ڈی پلس دے ڈیزائن وچ انج دا نظام موجود ہے جو اوہ اپنی ٹیکنالوجی تے ہر قسم دے باہرلے دبا توں بچاوندا ہے۔ مثال دے طور تے ایس دے بناون والیاں دا آکھنا ہے کہ اوہ ایس دی نقل دے طور تے تیار کیتی گئی ڈسک نوں لاک کر سکدے ہین جیس دے تت وچ ایہہ ڈسک ورتن دے قابل نہیں رہندی۔
