مسواک، دنداں وچ تیلی پھیرنا، کرُولی تے تھُک تُسیں ہر ٹوٹکا دنداں نوں لشکاون واسطے کردے او۔ پر کیہ تُسیں دھی کھاندے او؟ خورے ایہنوں ناں پلے پاؤگے پر کھوجاں توں گویڑ لگی اے کہ دہی کھان والیاں نوں مسوڑھیاں تے دنداں دی گھٹ بیماریاں لگدیاں ہین۔
ایس واسطے بس ہر روز تھوڑا جیہا دہی کھانا پوے گا۔ کھوجیاں مطابق دہی وچ اجیہا صحت مند بیکٹیریاہندا جے جو دنداں تے مسوڑھیاں دی حفاظت کردا اے سگوں ایہہ تہاڈے مونہہ وچ بھیڑے بیکٹیریا دا بھار برابر رکھدا اے ایویں ای جیویں جنا تہاڈے وچ زور اے۔
دہی صحتمند بیکٹیریا دی حفاظت کرکے تہانوں بیماریاں توں بچاندا اے۔ حالیں ہوون والی اک پڑچول وچ کھوجکاراں نے ورکراں نوں روزانہ لیکٹوبیسلیئس ریوٹری ( فائدہ مند بیکٹریا) یاں پلیسبو دیاں خوراکاں 80 دناں تائیں کھلائیاں۔ لیکٹوبیسلیئس کھاون والے ورکراں چوں صرف 10 فیصدی نوں گل یاں گیسٹرو انٹیسٹینل انفکیشن ہوئی جیس نال اوہناں دے کم کرن وچ ہرج ہویا جدکہ پلیسبو کھان والے 26 فیصدی توں وی ودھ بیمار پے گئے۔
فائدہ مند بیکٹیریا تہاڈے انتڑیاں وچ وسوں کرلیندا اے تے انج خطرناک بیکٹیریا توں ہوئیاں انفکیشناں نوں روک لا کے ہاضمے وچ مدد کردا ہے۔ اینٹی بائیوٹک دواواں یاں ودھیر پیچس تے اُلٹ کارن انتڑیاں دے بیکٹیریا دا توازن خراب کردیندیاں ہین انج تُسیں بیماریاں دا شکار ہوجاندے ہو۔ لیکٹوبیسیلیس جیہڑی فائدہ مند بیکٹیریا دای اک قسم ہے گیسٹرو انٹسٹینل نالیاں وچ خطرناک بیکٹیریا نوں ودھن پھُلن تون روک کے مدافعتی خلیہ دے عمل دی بڑھوتری کرکے وائرس انفیکشن نال بھڑدا ہے۔ چیتے رہوے ہر دہی وچ لیکٹوبیسیلیئس روٹری نہیں ہندا۔
