جگ دے وڈے موسمی سائنسدان دا کہنا ایں کہ بحر اوقیانوس وچ چلدیاں " لا نینا" لہراں دی ٹھنڈ پاروں ایہہ سال 2007 دے مقابلے وچ ٹھنڈا رہوے گا۔
اقوام متحدہ دے موسمی ادارے دے سیکرٹری جنرل مائیکل جراؤد نے بی بی سی نوں دسیا کہ ممکن ہے کہ " لا نینا ایس ورہے گرمیاں وچ تورے وچ رہن گیاں۔" ویکھیا گیا اے کہ ' لانینا تے ایل نینے ' بحر اوقیانوس دی دو قدرتی چھَلاں ہین تے ایہناں دا اثر دنیا بھر نوں متاثر کردا ہے۔ 'ایل نینے' توں درجہ حرارت ودھدا ہے جد کہ ' لا نینا' توں درجہ حرارت ڈِگدا ہے۔ ایس ورہے بحر اوقیانوس طاقتور 'لا نینا' دے گھیرے وچ اے۔ کیہا جارہیا اے کہ ایہدے اِی اثر توں آسٹریلیا وچ چوکھا مینہ ورہیا تے چین دے ٹھنڈے علاقیاں وچ رج کے برفباری ہوئی سی۔
سائنسدان جراؤد دا کہنا اے کہ ایہدا اثر گرمیاں وچ وی برقرار رہوے گا تے جگتی درجہ حرارت اک ڈِگری تیک گھٹ ہو سکدا ہے۔
تے کیہ ایس دا مطلب ایہہ اے کہ 1998 دے مگروں دھرتی دا درجہ حرارت ودھنا اِی صرف ' ایل نینے' دا اثر اے۔ کجھ سائنسداناں نے سوال کیتا ہے کہ کیہ گلوبل وارمنگ اپنی سخر تے اپڑ چکی اے تے دھرتی نے گرین ہاؤس گیساں نے اک آس توں ودھ ڈِھل وِکھائی اے؟
جراؤد دا آکھنا اے کہ معاملہ ایہہ نہیں اے۔ اوہ کہندے نیں کہ 1998 دا درجہ حرارت ہُنے وی صدی دا سبھ توں اُچا درجہ حرارت والا سال ہو سکدا اے۔
لیکن دوجے سائنسداناں دا کہنا ایں کہ اگلے پنج سالاں دے درجہ حرارت اک وار ریکارڈ پدھر تیک ہور ودھن گے۔۔۔۔ ہوسکدا ہے کہ ایس توں 'ایل نینا' دے اگلے دور نال گنڈھ کے ویکھیا جاوے۔
1997-98 وچ جد ایل نینا آیا سی تد افریقہ تے ایشیا وچ فصلاں نوں چوکھا نقصان ہویا سی تے امریکہ دے لہندے کنڈھے تیک ہڑھ آیا سی۔
