مثال مشہور ہے جو موٹاپا سو بماریاں دی جڑ ہے۔ پر ہن تیکر ایہہ پتہ نہیں سی جو اہناں سو بماریاں وچ اک بڑھاپے وچ ہوون والا پاگل پن وی ہے۔ اک کاہڈو رپورٹ موجب وڈی عمرے موٹے بندیاں دے پاگل پن دے امکان ودھ جاندے ہین۔ جرنل آف دی امریکن اکیڈمی آف نیورولوجی نے پچھلیاں تن دہائیاں وچ 6500 بندیاں تے کاہڈ توں مگروں ایہہ رپورٹ جاری کیتی جیس وچ آکھیا گیا جو ودھے ہوئے ڈھڈ والے بندیاں وچ دل دیاں بماریاں تے شوگر توں وکھ دماغ وچ خلل ہوون دا شکار ہوون دا خطرہ وی ہوجاندا ہے۔
ایس کاہڈ وچ حصہ لین والے بندیاں نوں تناں درجیاں وچ ونڈھیا گیا سی جیس وچ نارمل جسم، وزن تے موٹاپا شامل ہین۔ رپورٹ دی لکھاری ریچل وٹمر دا آکھنا ہے جو مناسب وزن تے جسم ،پر ودھے ہوئے ڈھڈ والے بندیاں وچ وی پاگل پن دا شکار ہوون دے نوے فیصد امکان ہندے ہین۔
' ڈھڈ ودھن نال وزن وی ودھدا ہے تے انج دے بندے جیہڑے موٹے ہین تے جنہاں دا ڈھڈ وی ودھیا ہویا ہے، پاگل ہن دا بوہتا شکار ہندے ہین۔ اوہناں وچ ایس بماری دا تناسب 260 فیصد تیکر ہندا ہے''۔ کاہڈو رپورٹ وچ ایہہ نہیں دسیا گیا جو ڈھڈ دی چربی کیویں دماغ نوں متاثر کر سکدی ہے پر ایہہ ضرور آکھیا گیا جو وچلی چربی توں جان چھڈانا بوہتا اوکھا نہیں ہے۔ ریچل موجب مناسب خوراک تے ورزش نال ڈھڈ دی وچلی چربی گھل کے مُک جاندی ہے۔ ڈھڈ دے دوالے چربی نوں مُکا کے پاگل پن ورگیاں بماریاں نوں روکیا جاسکدا ہے۔
کاہڈوواں دا ارادہ ہے جو اوہ ہور کاہڈ کڈ کے چربی توں نکلن والے مادے دا دماغ یا یاداشت نال کوئی تعلق نوں ظاہر کرن دی کوشش کرن۔
ایس کاہڈ نوں اگے ودھا کے ایہہ جانن دی کوشش کیتی جاوے جو ڈھڈ گھٹ کرن نال پاگل پن دا خطرہ وی گھٹ ہوسکدا ہے۔حالی اہناں دا خیال ہے کہ کیوں جو بوہتے بندے موٹاپے دا شکار ہی ادھکڑ جئی عمر وچ ہندے ہین تے اوہناں نوں پہلاں توں ہی کنٹرول کرن دی کوشش کرنی چاہی دی ہے۔
