جنوبی کوریا دی پہلی زنانی خلا باز منگل نوں بین لااقوامی خلائی سٹیشن دے مشن تے ٹر جاون گئیاں۔ زنانی خلاباز مس یِی تے دو روسی خلاباز سوا گیاراں وجے قازقستان دے بیکنور سنٹر توں ٹرے ہوون گے۔ کوریا دی اُنتی سالاں دی انجینئر خلا وچ دس دیہاڑ رہن گئیاں تے ایس وچکار سائنسی تجربے کرن گئیاں۔ ایس مہم توں مگروں جنوبی کوریا وچ خلا وچ خلا باز گھلن والا چھیواں ایشیائی ملک بن جاوے گا۔
کوریا دی ایروسپیس ریسرچ انسٹیٹیوٹ دا آکھنا ہے جو خلائی مہم دے اخیرلے پربندھ یاں تیاریاں بڑے سوہنے طریقے نال چل رہیاں ہین ۔ صدر پیک ہونگ یلنہ نے آکھیا ' مس یِی دی صحت بوہت چنگی ہے تے اسیں راکٹ دی کامیابی نال روانگی لئی آس مند واں'۔
مس یِی دا مشن لئی چون چھتی ہزار درخواست گزاراں وچ کیتا گیا تے ایس مشن لئی جنوبی کوریا نوں ویہہ ملین ڈالر دا خرچہ چکنا پے رہیا ہے۔ پہلاں اک متبادل خلا باز دے طور تے چنی گئی مس یِی نوں اُس ویلے خلاء تے جاون دا موقع ملیا جدوں پہلی چنی اِکتی سالاں دی زنانی نے سپیس سنٹر دے ضابطیاں دی خلاف ورزی کیتی۔ پیر دے دیہاڑ اک نیوز کانفرنس وچ صحافیاں نے مس یِی نوں پچھیا جو اوہ بین الاقوامی خلائی سٹیشن تے اپڑ کے سب توں کیہہ کرن گئیاں تے اوہناں آکھیا ' میرا خیال ہے میں آکھاںگی ' واؤ''
اوہناں آکھیا اوہ آس کردیاں ہین جو اوہناں دے خلائی سفر توں دکھنی تے جنوبی کوریا دے وچکار تعلق چنگے ہوون گے۔ مس پی نے دوہواں روسیاں دے نال زمین تے اُنی اپریل نوں آونا ہے۔
