روزانہ اٹھ گلاس پانی پینا ضروری نہیں ہے : نویں ریسرچ

یونیورسٹی آف پینسلوانیا دے ماہراں نے صحت دے حوالے نال اک انج دی صلاح نوں جیس دی کئی واری تاکید کیتی جاندی ہے، بس اک روایت آکھ کے اوہنوں غیر ضروری آکھ دتا ہے۔ کئی ورہیاں توں ساڈیاں ماواں تے ڈاکٹر دسدے آئے ہین کہ روزانہ بوہت سارا پانی پینا چاہی دا۔ کئی واری ایہہ وی آکھیا جاندا ہے جو روزانہ اٹھ گلاس پانی پیون نال انسان بوہت ساریاں بماریاں توں بچیا رہندا ہے۔

ایس اصول توں سارے ہی جانکاری رکھدے ہین، پر اصل وچ ایس دی کوئی واضح بنیاد نہیں ۔ یونیورسٹی آف پنسلوانیا دے ماہراں نے اٹھ گلاس پانی روزانہ دی تھیوری دی اصل حقیقت جانن لئی پچھلے تریہہ سالاں دے کاہڈو مواد نوں چھانیا پر ایس دا کوئی حتمی جواب نہیں ملیا۔

یونیورسٹی آف پینسلوانیا دے ڈاکٹر سٹنلے گولڈ فرب ایس نویں کاہڈ دے سینئر لکھاری ہین۔ اوہناں موجب ایہہ سمجھنا سوکھا ہے جو وڈی مقدار وچ پانی پین دا خیال کتھوں شروع ہویا۔ اوہ آکھدے ہین جو پانی زندگی لئی ضروری ہے تے ممکن ہے جو لوکاں نے سوچیا ہووے کہ معمول موجب پانی پین نال جے صحت چنگی رہ سکدی ہے تے ایس دے بوہتا پین نال ہور چنگی ہو جاوے گی۔

ڈاکٹر گولڈ فرب تے اوہناں دے سنگیاں نے پانی دی بوہتی مقدار پین دے حق وچ دتیاں جاون والیاں پنج اہم دلیلاں دا جائزہ لیا۔ پہلا ایہہ کہ پانی دی بوہتی مقدار گردیاں توں تیزابی مادیاں دے کڈن وچ مدد دیندی ہے۔ اوہناں دا آکھنا ہے جو کسے کاہڈ توں وی ایس دعوے دی تصدیق نہیں ہوسکی۔

دوجا دعویٰ ایہہ کہ جسم دے اننگ بوہتے پانی نال چنگا کم کردے ہین۔ ماہراں موجب جسم وچ پانی دے ٹہرن دا دارومدار پین دی رفتار تے ہے۔ چھیتی توں چھیتی پانی پیون دی بجائے ہولی ہولی گھٹ بھرن نال پانی جسم وچ بوہتا چر موجود رہندا ہے۔

ڈائٹنگ کرن والیاں نوں کئی وار صلاح دتی جاندی ہے جو بوہتا پانی پین نال بھکھ وچ کمی ہوجاندی ہے۔ ڈاکٹر گولڈ فرب آکھدے ہین جو ایس بارے وچ دو وکھریاں وکھریاں آرا ہین۔ بوہتا پانی پیون دے حق وچ دو ہور دعویاں نوں وی، یعنی بوہتا پانی جلد دی رنگت نوں چنگا بناوندا ہے تے دوجا ایہہ کہ سرپیڑ نوں روکن وچ مدد ملدی ہے، ثابت نہیں کیتا جاسکیاہے۔

سوال ایہہ پیدا ہندا ہے جو کنی مقدار وچ پانی پینا مناسب ہے؟ ماہراں دا جواب ہے کہ کسے وی قسم دے مائع دے گیاراں گلاس زنانیاں لئی جدوں کہ مرداں لئی پندراں گلاس بوہت ہین۔ پر ایس مقدار وچ اوہ مائع تے ٹھوس غذا وی شامل ہے جیہڑی اسیں کھانے ہاں۔

ڈاکٹر گولڈ فرب آکھدے ہین جو سانوں صرف اینا پانی پینا چاہی دا جنی ساڈے جسم نوں لوڑ ہووے۔

وائس آف امریکہ دے شکرئیے نال