یورپی خلائی ادارے (اِیسا) دے ماہراں دا آکھنا ہے کہ اوہ دن دور نہیں جدوں چند تے پھل کھڑن گے۔ ماہراں نے ثابت کیتا ہے جو میریگولڈ چند تے پائی جاون والی چٹان نال رلدی ملدی مٹی تے بناء خوارک دے پیدا ہوسکدے ہین۔ کجھ لوک ایس پیش رفت نوں چند تے انسانی آبادی ول اک قدم سمجھدے ہین۔ پر ایہہ یورپی خلائی ادارے اِیسا دا منیا ہویا نظریہ نہیں ہے۔ ادارے دے اک وڈے رکن نے تے ایس گل نوں سائنسی افسانہ آکھیا ہے۔
ایس نظرئیے دے حمیتی ماہراں نے اپنی کاہڈ ویانا وچ یورپی جیو سائنسز یونین دے اجلاس وچ پیش کیتی سی جیہڑا یورپ وچ قرہ ارض، ایتھوں دے موسماں تے زمین دے گوانڈھی اجسام فلکی تے کاہڈ کرن والے ماہراں دا سبھ توں وڈا اکٹھ سی۔
ایس اجلاس وچ پیش کیتی جاون والی کاہڈ دا مقصد زمین توں خلاء وچ مٹی تے کھاد کھڑن توں بچنا سی۔ یوکرائن دے شہر کیو وچ نیشنل اکیڈمی آف سائنسز دی نتاشا کوزیرووسکا تے ارینا زیٹز نے چند دی سطح تے پائی جاون والی چٹان نال رلدی ملدی پسی ہوئی چٹان (انور تھوسائٹ) وچ میریگولڈ بیجے۔ پہلاں کوئی خاص نتیجہ نہ نکلیا پر کئی قسم دے بیکٹیریا نوںلیاندا گیا تے پھل نکل آئے۔ بیکٹیریا نے پودے نوں مٹی توں پوٹیشیم لین وچ مدد دتی۔
اہناں سالاں وچ اک لمے وقفے توں مگروں چند وچ پھیر دلچسپی ویکھن وچ آئی ہے۔ چین تے جاپان اپنی خلائی گڈیاں چند ول گھل چکے ہین جدوں کہ انڈیا وی کجھ مہینیاں وچ اپنی گڈی گھلن والا ہے۔ امریکہ سن دو ہزار ویہہ تیکر انسان چند تے لاہنا چاہندا ہے۔
