ماہراں موجب مشینی اکھ یاں ' بائیونک آئی' موروثی بماریاں دے کارن بینائی توں وانجھے لوکاں لئی اک وڈی آس بن سکدی ہے۔طبی ماہراں دی اک ٹیم نے لندن دے مورفیلڈ آئی ہسپتال وچ ایس طریقے تے کلینکل تجربے دے طور تے پہلی وار اک مریض دا علاج کیتا۔امریکہ نال تعلق رکھن والی اک فرم نے ایہہ نقلی اکھ بنائی ہے جیہڑی کہ اک عینک نال جڑی ہے۔ آکھیا جاندا ہے ایس طریقے نال مڈھلی بینائی بحال کیتی جاسکدی ہے پر ماہراں خبردار کیتا ہے کہ ایہہ حالی بوہت مڈھلے دور وچ ہے۔
تجربیاں دا مقصد اہناں لوکاں دا علاج کرنا ہے جیہڑے بینائی توں '' پگمنٹوسہ ریٹنیٹس' یاں اکھاں وچ سوج کارن محروم ہو جاندے ہین جیہڑیاں کہ موروثی بماریاں وچوں اک ہے تے ایہہ اکھ دے پردے نوں متاثر کردی ہے۔ ایہہ بماری اپنے عروج تیکر اپڑن وچ کئی سال لاوندی ہے تے عام طور تے ایس دی تشخیص گھٹ عمر وچ ہی ہوجاندی ہے۔
اک گویڑ موجب برطانیہ وچ ویہہ توں پنجھی ہزار بندے ایس دے مریض ہین۔ایہہ گل اُکا نہیں آکھی جاسکدی کہ پنجاہ سال توں گھٹ عمر دے اوہناں دو مریضاں نوں جنہاں دا ایس طریقے نال علاج کیتا گیا ہے کسے حد تیکر فیدا ہووے گا پر ڈاکٹر ایس بارے آس مند ہین۔ اکھاں دے سرجن لیڈن دا کروز دا آکھنا ہے کہ ایہہ طریقہ علاج زبردست ہے۔اوہناں آکھیا اہناں دوہواں مریضاں دا آپریشن کر کے اوہناں دیاں اکھاں وچ ایہہ مشین لا دتی گئی ہے تے اوہ صحت مند ہو رہے ہین۔
ایس بائیونک آئی یاں مشینی اکھ جیس دا ناں '' آر گس ٹو'' ہے اک کیمرے راہیں کم کردی ہے۔ ایہہ کیمرہ بنا کسے تار دے سگنل اک بوہت ہی سوہل ایکٹرونک ریسور تے ایکٹروڈ پینل نوں گھلدا ہے جیہڑا کہ اکھ دے وچ لایا جاندا ہے تے اہنوں اکھ دے پردے نال جوڑ دتا جاندا ہے۔
