گِری (ناریل) دے تیل نوں بالن دے طور تے ورت کے دنیا دا سب توں پہلا جہاز خیریں سلامتی اپنی منزل تے اپڑ گیا ہے۔ ورجینیا ائر لائن دے ایس جہاز نے لندن دے ہیتھرو ائرپورٹ توں ایمسٹرڈیم تیکر دا پینڈا کیتا۔ مسافراں نوں لیاؤن لیجاون والے ایس جہاز وچ حیاتیاتی تیل نوں بالن دے طور تے ورتیا گیا۔ ایس جہاز وچ اُڈاری ویلے کسے مسافر نوں نہیں سی بٹھایا گیا۔
ایس جہاز وچ ورتیا جاون والا حیاتیاتی بالن باسو ناں دے پھل تے گِری دے تیل نال بنایا گیا سی۔ ایس مہینے دے شروع وچ اک ائر بس، اے 380 جیٹ جہاز نے وی ایہو جہے دوجے بالن نوں ورتیا سی جیہنوں سینتھیٹک راہیں گیس توں محلول وچ بدلیا گیا سی۔ ماہراں دا آکھنا ہے کہ اُڈاری ویلے جے جہاز وچ کوئی خرابی ہو جاندی تے فیر وی دوجے انجناں نوں عام ورتوں والے تیل نال چلا کے جاری رکھیا جا سکدا سی۔
ایس بالن نوں بناؤن والی کمپنی دا آکھنا ہے کہ باسو دا بُوٹا برازیل وچ اُگدا ہے تے ایس ویلے باسو تے گِری دی جنی پیداوار ہے اوہنوں ویکھدیاں آکھیا جا سکدا ہے کہ جے ایہنوں جہازاں دے بالن دے طور تے ورتیا جاوے تے ایہدے نال کھاون پیون دے وسیلیاں تے کوئی اثر نہیں پوے گا۔
