جاپان دے اُگھے سائنسدان ڈاکٹر مساروایموٹو نے سَٹا کڈھیا اے کہ آبِ زمزم وچ کجھ اجیہیاں خاصیتاں ہُندیاں نیں جو ایس توں اَڈ دُنیا دے کسے ہور پانی وچ نہیں۔ اوہناں نے نینو ناں دی ٹیکنالوجی ورت کے آبِ زمزم تے چوکھیاں تحقیقاں کیتیاں ہین جیہناں توں اوہناں نوں معلوم ہویا کہ آبِ زمزم دا اک گھُٹ عام پانی دے اک ہزار گھُٹاں وچ رَلایا جاوے تے عام پانی وچ وی اوہی خاصیتاں پیندا ہوجاندیاں نیں جو زمزم وچ ہین۔
ڈاکٹر ایموٹو جاپان وچ قائم ہیڈو انسٹیٹوٹ فار ریسرچ دے مُکھی ہین تے اجکل سعودیہ دے دورے تے آئے ہوئے نیں۔ اوہناں نے اپنے اک لیکچر وچ کیہا کہ جاپان وچ اوہناں نوں اک عرب واسی توں آبِ زمزم ملیا جیس اُتے اوہناںچوکھیاں پڑچولاں کیتیاں۔ پڑچول توں معلوم ہویا کہ زمزم دے اک تِبکےدا بلور ( اک لشکدا معدنی جوہر) اپنی وکھری پچھان رکھدا ہے۔ کسے دوجے پانی دےتِبکے دے بلور توں سانگا نہیں رِلدا۔ دھرتی دے کسے وی خطے توں لِتے گئے پانی دیاں خاصیتاں زمزم ناں نہیں رِلدیاں۔ اوہناں لیبارٹری ٹیسٹاں راہیں معلوم کیتاکہ آبِ زمزم دے خاصیتاںنوں تبدیل کرنا ممکن نہیں۔ ایہدی اصل وجہ جانن توں سائنس وانجھی ہے۔ زمزم دی ری سائکلنگ کرن مگروں وی ایہدے بلور وچ تبدیلی نہیں ہوئی۔
جاپانی سائنسدان نے ہوربھید کھولدے کیہا کہ مسلمان کھان، پین تے ہر کم کرن توں پہلاں "بسم اللہ" پڑھدے نیں۔ اوہناں نے کہا کہ جیس پانی تے " بسم اللہ" پڑھی جاوے اوہدے وچ عجیب قسم دی تبدیلی آجاندی ہے۔ لیبارٹری ٹیسٹ دے راہیں عام پانی نوں طاقتور خوردبین راہیں ویکھیا گیا تے اوس تے " بسم اللہ" پڑھن مگروں ویکھیا گیا کہ تے اوہدے ذریاں وچ تبدیلی ہوگئی سی۔ بسم اللہ پڑھن مگروں پانی دے تبکے وچ خوبصورت بلور بن گئے سن۔ اوہناں کیہا کہ پانی تے قرآن مجید دی آیتاں پڑھائیاں تے اوہدے وچ عجیب قسم دی تبدیلی ہوئی۔ اوہناں کیہا کہ پانی وچ اللہ تعالیٰ نے عجیب قسم دی جوگتا رکھی ہے۔ پانی وچ سُنن دی طاقت، احساس، یادداشت تے ماحول توں متاثر ہون دی صلاحیت ہے۔ جیکر پانی تے قرآن مجید دی آیتاں دی تلاوت کیتی جاوے تاں اوہدے وچ وکھرے علاج دی جوگتا پیدا ہو سکدی ہے۔ پانی ماحول دے منفی تے مثبت حالات دا اثر قبولدا ہے۔ ڈاکٹر ایموٹو نے کیہا کی بھوئیں دی ساریاں مخلوقاں بھاویں اوہ پھُل بوٹے اِی کیوں ناں ہون اوہناں وچ ماحول دا اثر قبول کرن دی جوگتا ہے۔ کائنات دا ہر تِیکھا شعور رکھدا ہے تے ایسے شعور دے نتیجے وچ اوہ اپنے خالق دی تسبیح وچ رُجھیا ہے۔
