تسی سنیا ہووے گا کہ انسانی جسم وچ دماغ اک انج دا حصہ ہے جیہڑا جثے دے حساب تے کم نہیں کردا، سگوں بھار دے لحاظ نال جسم دے صرف دو فیصد ہوون دے مگروں وی کل توانائی دا ویہہ فیصد حصہ ہڑپ کر جاندا ہے۔ پر ایس سوال دا جواب سائنس داناں نوں وی نہیں پتہ سی کہ کیوں؟
ایہہ تاں ٹھیک ہے کہ دماغ دے وچ گرِڈ سٹیشن وانگوں بے شمار تاراں تے کنکشن ایدھروں اودھر جا رہے ہوندے ہین جیہڑے ہر ویلے بڑے مصروف رہندے ہین۔ ایتھوں تیکر کہ نیندر وچ وی دماغ دی ایس گہماگہمی وچ کوئی خاص فرق نہیں پیندا۔
پر ہن امریکہ دی نیشنل اکیڈمی آف سائنسز نے خیال پیش کیتا ہے کہ دماغ جنی توانائی ورت دا ہے ایس دا دو تہائی حصہ نرو خلیاں یاں نیورانز نوں بجلی دے سگنل گھلن وچ مدد کرن وچ خرچ ہوندا ہے۔ یونیورسٹی آف منی سوٹا میڈیکل سکول دے وائی چین ایس عمل نوں ' روز دی ویکھ بھال آکھدے ہین'۔
تسی اہنوں پاکستانی حکومت دی اصطلاح وچ ' نان ڈیویلپمنٹل چارجز'' کہہ سکدے او۔ فرق بس ایہہ ہے کہ ایہہ خرچ دماغی کارکردگی لئی بوہت ضروری ہے تے چین موجب ایس توں بناء دماغی خلیے مرنا شروع ہو جاون گے۔
ایہہ تت دماغ دے میگنیٹک ریزوننس سپیکروسکوپی سکین کرن توں مگروں کڈیا گیا جیس وچ ایہہ ناپن دی کوشش کیتی گئی کہ دماغ کنی توانائی ورت دا ہے۔ ایس مقصد لئی اک خاص قسم دے مالی کیول تے توجہ رکھی گئی جنہوں اے ٹی پی آکھیا جاندا ہے۔ اے ٹی پی جثے وچ بالن دے طور تے ورتیا جاندا ہے۔ دماغ دے کئی حصیاں وچ ایس دی مقدار وچ گھاٹے وادھے دا جائزہ لین نال دماغ دی کارکردگی دا گویڑ لایا جاسکدا ہے۔
چین دا آکھنا ہے کہ ٹیکنالوجی کئی عشریاں توں موجود سی پر ایس نوں بوہتا دوجے اننگاں وچ ورتیا جاندا ہے۔ اوہ کہندے نیں کہ ایس نوں مریض دے دماغ وچ کئی قسم دیاں بماریاں دا پتہ لاون لئی ورتیا جاندا ہے جنہاں وچ آلز ہائمر تے پارکنسن دیاں بماریاں وی رلتی نیں۔
حالی تیکر ایس تکنیک نوں جانوراں وچ ورتیا گیا ہے پر چین دا ارادہ ہے کہ ایس دا دائرہ بوہت چھیتی انساناں تیکر وی ودھایا جاوے۔
