ٹھوویں نوں اک بڑا زہریلا کیڑا سمجھیا جاندا اے تے جنہوں لڑ جاوے اوہنوں بوہت پیڑ ہوندی ہے۔ ٹھوویں دیاں کجھ نسلاں انج دیاں وی ہین جنہاں دا ڈنگ اینا زہریلا ہے کہ ایس نال بندہ مر وی سکدا ہے۔ پر ہن طبی ماہراں دا آکھنا ہے کہ ایس دے زہر وچ اک انج دا جزو موجود ہے جیس نال دماغ دے کینسر دا علاج ہو سکدا ہے۔ امریکہ دے چار وکھرے وکھرے ہسپتالاں وچ چار انج دے مریضاں دا علاج ٹھوویں دے زہر نال کیتا جارہیا ہے جنہاں دے دماغ وچ کینسر دی رسولی ہے۔
ماہراں دا آکھنا ہے کہ ٹھوویں دے زہر وچ اک اُچیچا جزو ہے جیس وچ ایہہ خوبی ہے کہ اوہ کینسر دا علاج کرن والی دوائی نوں اُس رسولی تیکر اپڑا سکدا ہے۔ جدوں کہ ایس توں پہلاں ماہراں نوں دماغ وچ سرطان دی رسولی تیکر دوا اپڑاون وچ اوکھت ہوندی سی۔
طبی ماہراں نوں آس ہے کہ ٹھوویں دے زہر توں حاصل جزو دماغ دے کینسر دے مریضاں لئی بوہت فیدے مند ہووے گا۔
