بیبیو، جے تسیں بجلی دی بچت کرنی ہے تے ماحولیات نوں دل نال لاونا ہے تے ایہو جیہی شمسی انگیا بن گئی ہے جیس نال اینی بجلی پیدا ہوندی ہے جو موبائل فون چارج ہو سکدا ہے۔
جاپان دی کمپنی ٹرایمف انٹرنیشنل جاپان لمیٹد نے بدھ نوں ہرے رنگ دی اک ''شمسی انگیا'' دی ایجاد دا اعلان کردتا ہے۔ ایہہ انگیا روشنی نال بجلی پیدا کرے گی۔پر ایہہ اجے بازار وچ ویچن لئی نہیں جا رہی کیوں جو صرف انگیا پاکے کوئی باہر نہیں جا سکدا تے جے ایس دے اُتے کوئی ہور کپڑا پا لیا جاوے تے ایہہ بجلی پیدا نہیں کردی۔
کمپنی دے بولارے میسوڈا دا کہنا ہے جو بھانویں ایہہ انگیا اجے بازار وچ نہ وکے پر ایس نال اک گل ثابت ہو جاندی ہے جو اسیں اپنے کپڑیاں راہیں کیویں دنیا نوں بچا سکدے ہاں۔ اوہناں ایہہ وی کہیا جو ایس انگیا نوں نہ دھویا جاوے تے نہ گلا ہوون دتا جاوے۔
