ڈیپریشن دور کرن والیاں دوائیاں ورتنا محفوظ تے فیدے مند ہے: نویں کاہڈ

ڈپریشن اج دے دور دی بماری ہے تے اہنوںدور کرن لئی دوائیاں دا ورتنا وی فیشن بن دا جارہیا ہے۔ کجھ اینٹی ڈپریسنٹ میڈیسنز دی پیکنگ تے ایہہ وارننگ لکھی ہوندی ہے کہ ایس دوائی نوں ورتن نال نوجوان خود کشی ول ودھ سکدے ہین۔ پر ہن ماہراں نے پنج ہزار نیانیاں تے جواناں تے اک نویں ریسرچ توں مگروں دعویٰ کیتا ہے کہ اینٹی ڈیپریسنٹ دوائیاں ورتنا محفوظ تے فیدے مند ہے۔

تن سال پہلوں جدوں ریان یارک دی عمر چوداں سال سی ڈاکٹر نے اوہناں لئی اک اینٹی ڈپریسنٹ دوا پیکسل دسی سی۔ پر اوہناں دی حالت چنگی ہوون دی بجائے ہور وگڑ گئی تے اوہناں آپ ہتیا دی کوشش وی کیتی۔ ریان کہندے ہین کہ اُس ویلے مینوں سکول، گھر والیاں تے بیلیاں دی ہی نہیں سگوں اپنی وی کوئی پرواہ نہیں سی۔

انج دے اک ہور واقعے وچ اک زنانی میری این نے امریکی فوڈ اینڈ ڈرگ ایڈمنسٹریشن دے کول اپنی شکایت درج کراوندیاں ہوئیاں کہیا کہ اک ڈاکٹر نے اوہناں دی دھی بیتھ نوں نیند نہ آون دے علاج لئی اینٹی ڈپریسنٹ دوائی دسی سی۔ ڈاکٹر نے کہیا سی کہ اوہ دو ہفتیاں وچ ٹھیک ہو جاوے گی۔ پر دوائی دے ورتن دے ستویں دیہاڑ جدوں اوہ دفتر توں گھر واپس آئیاں تے اوہناں دی دھی گل وچ پھاہ لے کے مرچکی سی۔

ہن فوڈ اینڈ ڈرگ ایڈمنسٹریشن نے دوائیاں بناون والے اداریاں نوں پابند کیتا ہے کہ اینٹی ڈپریسنٹ دوائیاں تے اک صاف وارننگ لکھن جیس وچ خبردار کیتا گیا ہووے کہ اہناں دے ورتن نال جواناں وچ خود کشی دا رجحان وی پیدا ہوسکدا ہے۔

امریکہ دے نیشنل انسٹی ٹیوٹ برائے مینٹل ہیلتھ نے ایس بارے کاہڈ جاری رکھن لئی فنڈز دتے ہین۔ کاہڈ حالی جاری ہے۔ امریکن میڈیکل ایسوسی ایشن دے جرنل وچ چھپن والے اک مطالعے موجب انٹی ڈپریسنٹ دوائیاں دا ورتنا نیانیاں تے وڈیاں لئی اُکا محفوظ ہے۔ ڈاکٹر ڈیوڈ برنیٹ دا کہنا ہے کہ اسیں اپنی کاہڈ دے مڈھ تے ایہہ کہہ سکنے ہاں کہ ہن اینٹی ڈپریسنٹ دوائیاں تے بلیک باکس وارننگ دے قنون تے نظر ثانی ہونی چاہی دی ہے۔

ڈاکٹر ڈیوڈ برنیٹ پٹس برگ میڈیکل سکول وچ ماہر نفسیات دے طور تے کم کر رہے ہین۔ اوہناں نے ڈپریشن دور کرن والیاں دوائیاں ورتن والے پنج ہزار نیانیاں تے وڈیاں تے تحقیق کیتی ہے ۔ اوہناں دا کہنا ہے کہ خورے سو وچوں اک نیانے وچ خود کشی دیاں علامتاں پیدا ہو جاون پر نہ تے کسے نے خود کشی دی کوشش کیتی تے نہ ہی اوہ ایس وچ کامیاب ہویا۔

اینٹی ڈپریسنٹ دوائیاں چنتا تے ذہنی دبا یاں ڈپریشن دے علاج لئی دسیاں جاندیاں ہین۔ ڈاکٹر برینٹ تے اوہناں دی کاہڈ موجب اینٹی ڈپریسنٹ دوائیاں اہناں نیانیاں تے وڈیاں لئی فیدے مند ہوندیاں ہین جیہڑے چنتا دا شکار ہوندے ہین۔ نیانیاں دیاں بماریاں دے ماہر پامیلا مرے دا کہنا ہے کہ میرا تجربہ ایہہ دسدا ہے کہ اینٹی ڈپریسنٹ دوائیاں دے ورتن نال لوکاں نوں فیدا ہویا ہے۔

پچھلے سال نومبر وچ بلیک باکس وارننگ دا قنون لاون توں مگروں ایہہ گل ساہمنے آئی ہے کہ گھٹ توں گھٹ نیانیاں لئی اینٹی ڈپریسنٹ دوائیاں تجویز کیتیاں جارہیاں ہین۔چنتا دی گل ایہہ ہے کہ کسے فیدے مند اینٹی ڈپریسنٹ دوائی دے نہ ہوون کارن صرف امریکہ وچ ہی نہیں ساری دنیا وچ خود کشی دی شرح ودھ رہی ہے۔ نیشنل انسٹی ٹیوٹ فارمینٹل ہیلتھ ولوں کروائی جاون والی نویں کاہڈ توں آس رکھی جارہی ہے کہ ایہہ پتہ لایا جاسکے گا کہ اینٹی ڈپریسنٹ دوائیاں واقعی خود کشی ول لے جاندیاں ہین؟ ایس کاہڈ نال ڈاکٹراں نوں خود کشی دا رجحان رکھن والے مریضاں دی تشخیص وچ وی مدد ملے گی۔

وائس آف امریکہ دے شکرئیے نال