پٹرول دے بحران دا حل،ہائیڈروجن نال چلن والی کار بن گئی
وچار ڈیسک
June 7th, 2008
اک جاپانی کاراں بناون والی کمپنی ٹویوٹا نے کہیا ہے کہ اوہناں اک انج دی کار بنائی ہے جیہڑی روایتی ایندھن توں بناء کئی سو کلومیٹر فاصلہ طے کر سکدی ہے۔ایہہ نویں کارہائیڈروجن گیس تے چلدی ہے تے اپنے اک ٹینک توں 830 کلومیٹر دا پینڈا کردی ہے۔ کار بناون والی کمپنی نے کہیا ہے کہ ایس نال کار دے بریکاں دے نظام تے دوجیاں بدلیاں راہیں ایس دی ایندھن دی کھپت پنجھی فیصد گھٹی ہے۔
ٹویوٹا نے کہیا ہے کہ ایہہ نویں کار منفی تریہہ ڈگری سینٹی گریڈ دے درجہ حرارت تے وی سٹارٹ ہوسکدی ہے تے چل سکدی ہے۔ کئی کار بناون والیاں کمپنیاں تیل دیاں ودھدیاں ہوئیاں قیمتاں تے ماحولیاتی بدلی تے ڈر دے کارن روائتی پٹرول نال چلن والیاں کاراں دے متبادل دے طور تے ہائیڈروجن ایندھن نال چلن والیاں گڈیاں بناون تے کم کررہیاں ہین۔
ہائیڈروجن انجن وچ ہائیڈروجن گیس ورتی جاندی ہے جیہڑی ہوا وچ موجود آکسیجن دے نال رل کے انجن وچ بلدی ہے جیس دے تت وچ ایگزاسٹ توں پانی نکلدا ہے جیس نال ماحول وچ آلودگی نہیں کھلردی۔
