بی بی سی دی نیچرل ہسٹری ٹیم نے چین دے جنگلاں وچ پانڈا دے پیار محبت تے جنسی کم تیکر پوری ویڈیو ریکارڈنگ کیتی ہے جیہڑی کہ ٹی وی دی دنیا وچ پہلا واقعہ ہے۔ پانڈہ روایتی طور تے اک چپ کیتا جانور ہے تے چین دے وانس دے جنگلاں وچ وانس کھاندا ہے تے خش رہندا ہے۔ پر بی بی سی دی ویڈیو وچ وکھالیا گیا ہے کہ اک خاص سیزن وچ جدوں پانڈہ اپنی مادہ نوں اپنے ول رجھاوندا ہے تے بڑا جوش وچ آجاندا ہے تے جے کوئی ہور پانڈہ ایسے مادہ نوں اپنی ول کرن دی کوشش کردا ہے تے پانڈہ مارا مار تے اتر آونداہے۔
ویڈیو وچ وکھایا گیا ہے کہ پانڈہ اپنی مادہ نوں پاون لئی ہر جتن کردا ہے تے اخیر کامیاب وی ہوندا ہے تے اُس ویلے اوہ انوکھیاں آوازاں کڈ دا ہے۔اک منظر وچ وکھایا گیا کہ مادہ پانڈہ رُکھ تے چڑھی ہوئی تے نر پانڈہ اوہنوں رجھاون لئی آوازاں کڈ دا تے رُکھ توں تھلے لتھن لئی کہندا ہے پر ایسے وچکار اک دوجا نر پانڈہ ایس مادہ نوں رجھاون لئی آوازاں کڈ دا ہے تے ایس تے دوجا پانڈا رُس جاندا ہے۔ ایہہ ویڈیو بی بی سی ٹو ورلڈ دی وائلڈ چائنہ سیریز لئی ریکارڈ کیتی گئی ہے اہناں تصویراں وچ پانڈا دے جنسی کم نوں ہر پاسیوں وکھایا گیا ہے جیہڑا کہ دنیا دے کسے وی چڑیا گھر وچ ویکھن نوں نہیں ملدا ہے۔
وائلڈ چائنہ دے پرڈیوسر گیون میکسیل دا کہنا ہے ' بوہتے پانڈے کلے رہندے ہین تے کسے نال بوہتے گھلدے ملدے نہیں پر صرف جنسی ساک بناون دے سمے ہی اوہ اک دوجے نال ہوندے ہین تے ون سونیاں آوازاں کڈ دے ہین۔'ایہہ آوازاں اینیاں وکھریاں ہوندیاں ہین کہ گھٹو گھٹ ایہہ یقین کرنا اوکھا ہوندا ہے کہ ایہہ پانڈے دیاں آوازاں ہین۔
ایہہ آوازاں اُس ویلے ہور تیز ہو جاندیاں نیں جدوں اک مادہ دے کول تن یاں چار نر پانڈے آجاندے ہین۔ ایس ویلے پانڈے ایس لئی آوازاں کڈے دے ہین کہ کِتے دوجا پانڈہ مادہ نوں نہ لے جاوے۔پانڈے دی انج شوٹنگ کرن لئی صرف بوہت ساری ریسرچ ہی نہیں کرنی پئی سگوں چین دے پربندھیاں توں اجازت لینی وی سوکھی نہیں سی۔ ویڈیو نوں بناونا اک اُچیچا ہنر، صبر تے خش نصیبی نال ہی ہویا۔
چین دے جنہاں وانساں دے جنگلاں وچ اہناں پانڈیاں دی ویڈیو بنائی گئی اوہ اینے گھنے ہین کہ پانڈے دے نیڑے جاونا وی اوکھا سی اک چنگا تے صاف شوٹ لینا دور دی گل ہے۔ پانڈہ ول جاندیاں ویلے جے بوہتا رولا پایا جاوے تے پانڈہ بوہت دور چلے جاون گے تے تسی اپنا گھر لبھدے رہ جاؤ گے۔
اخیر وچ بی بی سی دی ٹیم نوں اک انج دی تھاں لبھی جتھے مادہ پانڈہ اک نوکیلی پہاڑی ول مونہہ کر کے اک رُکھ تے چڑھی ہوئی سی تے رُکھ ہیٹھ اوہدا عاشق ون سونیاں آوازاں کڈ کے اوہنوں ہیٹھاں سدن دے جتن کر رہیا سی۔اینے وچ اک ہور پانڈہ ایسے مادہ نوں رجھاون لئی آوازاں کڈدا ہے تے رُکھ ہیٹھاں کھلوتا پانڈہ اوہنوں نساون لئی جاوندا ہے تے اخیر وچ جدوں نر پانڈہ رُکھ توں تھلے لتھ دی ہے تے اوہنوں لے کے ٹر جاندا ہے۔
ایہہ پہلی واری نہیں ہے کہ جدوں پانڈہ دے جنسی کم نوں ویڈیو تے لایا گیا ہووے پر ایہہ پہلی وار ہے جدوں اوہدی محبت دا پورا عمل وکھایا گیا ہووے۔مسٹر میکسویل دا کہنا ہے کہ پانڈہ دا ایہہ ورتارا اکھاں کھول دیون والا سی کیوں جو پانڈے دی شبیہ اک چپ کیتے جانور دی ہے۔
اوہناں ہور کہیا کدی کدی انج ہوندا سی کہ اسیں چپ کر کے بیٹھے ہوئے آں تے اچن چیتی اک پانڈہ وانساں دے جنگل توں نکل کے تہادے ول آوندا ہے ۔اوہ زور زور نال ساہ لیندیاں ہوئیاں ہف رہے ہوندے سن، تے تسی اوہناں دے مونہوں نکلن والی بھاپ نوں ویکھ سکدے او لگدا سی کہ ایہہ پانڈہ نہیں کوئی ہور جانور ہے۔
