پاکستان وچ دنیا دا سبھ توں وڈا آئی ٹی سینٹر بنے گا
وچار ڈیسک
June 9th, 2008
کراچی دے ناظم مصطفی کمال نے آکھیا ہے کہ ارباں روپئیاں دی لاگت نال دنیا دا سبھ توں وڈا آئی ٹی ٹاور بنے گا۔ ایہہ منصوبہ دو ورھیاں وچ پورا کیتا جاوے گا۔ اساری پوری ہوون تے ایہہ دنیا دا سبھ توں وڈا کال سینٹر ہووے گا۔
ایس ویلے آسٹریلیا دے شہر سڈنی وچ دنیا دا سبھ توں وڈا کال سینٹر ہے جتھے 8000 کال سیٹاں رکھیا گئیاں ہین پر کراچی وچ بنن والے ایس ٹاور وچ 10000 کال سیٹاں اکو چھت ہیٹھاں رکھیاں جاون گیاں۔
مصطفی کمال نے ایہہ گل آئی ٹی ایکسپو 2008 دا دورہ کرن مگروں میڈیا نال گل بات کردیاں آکھی۔ اوہناں آکھیا کہ شہری حکومت دا ٹال فری نمبر 1339 پوری دنیا وی انوکھا ہے۔ اوہناں آکھیا کہ کراچی دی شہری حکومت نے کال سینٹر دی سکھلائی دیون لئی ملک توں باہروں ماہر منگوائے ہین۔ 7500 بندیاں دا پہلا پُور چھیتی ہی تیار ہو جاوے گا۔ شہری حکومت سکھن والے ہر بندے تے 60 ہزار روپیئہ خرچ کر رہی ہے۔
