اک نویں کاہڈ وچ ایہہ کھوج کرن دا جتن ہو رہیا ہے کہ کیہ بندے دے سویرے سانجھرے اُٹھن یاں راتیں کویلے سون دی وجہ بندے دے جینز نوں پرکھ کے لبھی جا سکدی ہے یاں نہیں۔ نویں کاہڈ وچ ایس کھوج دے عمل نوں سوکھا کیتا جا رہیا ہے تے ایس کھوج لئی رت دے نمونے نہیں سگوں تُھک نال ای پتہ لگ جایا کرے گا۔
پنڈے وچ سون تے جاگن دے ویلے نوں ''سرکیڈئین ردھم'' آکھیا جاندا ہے۔ ایس ٹیسٹ وچ اہناں جینز دی پچھان ہو جاندی ہے جیہڑے ایس ویلے تے اثر پاؤندے ہین۔ '''سرکیڈئین ردھم'' تے کئی وکھریاں وکھریاں جینز اثر پاؤندیاں ہین تے اوہناں نال بنن والے 'رائیبو نیوکلیئک ایسڈ' مطلب 'آر این اے' دی مقدار نال انفرادی سرکیڈئین ردھم بنندے ہین۔ آر این اے دے بنن پاروں بندے نوں وکھرے وکھرے ویلیاں وچ سستی یا چستی محسوس ہندی ہے۔
برطانیہ دے شہر چیلٹنھم وچ پچھلے ہفتے ہوون والے اک سائنسی میلے وچ ایس جین تے کاہڈ کڈھی گئی۔ میلے وچ اک خطاب دے مگروں تے پہلوں کئی بندیاں دے تُھک دے نمونے لئے گئے تے اہناں وچ اہناں جینز دا پتہ وی لا کے ویکھیا جاوے گا کہ اہناں بندیاں وچ سستی دا کیہ حال رہیا۔
لوکاں وچ سون تے جاگن دے وکھرے ویلے دے رجحان نال بوہتا ویاہیاں ورھیاں جوڑیان وچ پاڑ پیندے ہین کیونجے اک بندہ سویرے اُٹھ سکدا ہے جدوں کہ دوجے بندے نوں رات کویلے تیکر جاگنا چنگا لگدا ہے۔ سائنسداناں دا آکھنا ہے کہ ایس نویں ٹیسٹ نال ہن اُکا اوہناں بندیاں دے رجحاناں دی ای پتہ نہیں لگے گا سگوں ایس نال جینز تے کئی شیواں دے اثر دا پتہ لاؤن وچ وی سوکھت ہووے گی۔
