پچھلے ہفتے امریکہ دے شہر نیویارک وچ اک سائنسی میلہ لایا گیا جیہدے وچ سائنس تے بندیاں بارے رنگ برنگے ٹیوے لائے گئے تے ایہو جہیاں ایجاداں دے منصوبے پیش کیتے گئے جیہناں دے بندے دی حیاتی تے بڑے ڈونگھے اثر ہوون گے۔ ایہو جہیاں کجھ ایجاداں دے نمونے ہیٹھاں دتے جا رہے ہین۔
کیہ تسیں بوہت موٹے او تے بھار گھٹاؤنا چاہوندے ہو؟ کیہ تسیں بھار گھٹاؤن دا ہر حیلہ ورت کے ویکھ لیا اے تے بھار نہیں گھٹیا؟ فکر نہ کرو، دس ورھیاں دے وچ وچ اک ایہو جہی دوا بن جاوے گی جیہنوں ورت کے تسیں جو مرضی کھاندے رہنا تہاڈا بھار نہیں ودھے گا۔
کیہ گرین ہاؤس گیساں دے ودھدے اخراج نال دنیا وچ ودھدی ہوئی گرمی پاروں تہاڈیاں راتاں دیاں نیندراں اُڈ گئیاں نیں؟ تہاڈے لئی چنگی خبر اے کہ 20ورھیاں دے وچ وچ سورج دی توانائی دے کھیتر وچ اینی ترقی ہو جاوے گی کہ ایہدے نال دنیا دی توانائی دیاں ساریاں لوڑاں پوریاں ہو سکن گیاں۔
ایسے ای میلے وچ رلتی اک سائنسدان ڈاکٹر کرزوائل نے اک ہور چنگا ٹیوا لایا ہے۔ اوہناں آکھیا کہ اگلے پندراں ورھیاں وچ طبی سائنس اینی اگے ودھ جاوے گی کہ بندے دی عمر وچ بڑی چھیتی وادھا ہونا شروع ہو جاوے گا۔ اکیویں صدی دے ادھ تیکر پجدیاں بندا تے کمپوٹر اک مک ہو جاون گے تے مرن دا تصور وی فنا ہو جاوے گا۔ ڈاکٹر دی ایہہ گل منن نوں جی تے نہیں کردا پر لوک ایہہ وی منندے ہین کہ اوہ اینویں نہیں چھڈدا تے اوہدی کاہڈ دے پکے سائنسی ثبوت ہوندے ہین۔
مثال دے طور تے اوہناں نے 1990 وچ آکھیا سی کہ 1998 دے آؤندیاں آؤندیان کمپیوٹر شطرنج دے کھیڈ وچ ایہدے عالمی چیمپیئن نوں ہرا دیوے گا تے 1998 توں اک سال پہلوں ای آئی بی ایم دے بنائے کمپیوٹر نے شطرنج دے عالمی چیمپیئن گیری کاسپاروف نوں ہرا دتا سی۔
ڈاکٹر کرزوائل دا دعویٰ ہے کہ اج دے دور وچ بیالوجی، طب، توانائی تے دوجے شعبیاں وچ انفارمیشن ٹیکنالوجی پاروں انقلاب آ رہیا ہے۔ اوہناں دا آکھنا ہے کہ 2020ء تیکر ایس ترقی پاروں بندا اینی جوگا ہو جاوے گا کہ اوہ بندے دے دماغ وچ کمپیوٹر چپ واڑ سکے گا تے ایہو جہے کمپیوٹر بنا سکے گا جیہڑے بندے جنے ذہین ہوون گے۔
پر ایسے ہی میلے وچ رلتی اک نیوروسائنسدان ڈاکٹر رام چندن نے ایس گل نوں نہیں منیا۔ اوہناں وچار وٹاندرا کردیاں آکھیا کہ ہو سکدا اے کہ بندہ اک ذہین تے سوچن والا کمپیوٹر بنا لوے پر ایہہ نہیں ہو سکدا کہ اوہ بندے دے دماغ وچ چپ واڑ جے اوہنوں ودھیا کر لوے کیوں جے بندے دا دماغ کروڑاں ورھیاں وچ ترقی کردا ایس تھاہر تے پُجا ہے تے ایہدے سرکٹ بڑے بے ترتیب تے من موجی ہوندے ہین۔
کئی دوجے سائنسداناں دا وچار ہے کہ بندے ورگا ذہین کمپیوٹر بنایا تے جا سکدا اے پر ایہدے تے حالے بوہت ویلا لگے گا۔ ساری نکھیدی مگروں وی ڈاکٹر کرزوایل اپنے ایس ٹیوے تے اینے پکے ہین کہ اوہناں نے 10000 ڈالر دی شرط لائی ہے کہ 2029 تیکر ایہو جہیا کمپیوٹر بن جاوے گا جیہدے نال کمپیوٹر بندے نال اینی ذہانت نال گل کرے کہ ایہہ پتہ نہ لگے کہ بندہ گل کر رہیا ہے یاں مشین۔
