سولاں ورھیاں دا اجے دسویں جماعت وچ پڑھدا ہے پر انٹرنیٹ تے سینکڑے لوکاں دے کریڈٹ کارڈ چوری کر کے لکھ پتی بن گیا۔ اجے نوں پولیس نے جمعرات دے دیہاڑے ممبئی وچوں پھڑیا تے گجرات پولیس نے اوہدے تے انٹرنیٹ تے فراڈ کرن دا مقدمہ بنایا ہے۔ سینٹ این سکول دا ایہہ پڑھیار انٹرنیٹ تے آن لائن شاپنگ دیاں ویب سائٹاں نوں سنھ لاؤندا سی تے انٹرنیٹ تے شیواں خریدن والے لوکاں دے اکاؤنٹاں وچوں پیسے اپنے اکاؤنٹ وچ پا لیندا سی۔
ایہہ گینگ اودوں پھڑیا گیا جدوں احمد آباد دی کرائم برانچ اک مشہور شاپنگ ویب سائٹ دی ہیکنگ دی پُن چھان کر رہی سی تے اوہنے شہر دے تن منڈیاں نوں پھڑیا۔ مگروں اوہناں دا سانگا اجے گینگ نال نکلیا۔ پُن چھان توں پتہ لگا ہے کہ ایہہ گینگ ممبئی، حیدرآباد، بینگلور تے احمد آباد وچ کھلریا ہوئیا ہے۔ ایہدے استاد امریکہ، ویتنام تے دوجے ملکاں وچ وسدے ہین۔
اجے جیہڑا اک ٹیکسٹائل فرم دے ملازم دا پُتر اے، کالو پور وچ رہندے وحید خان تے جودھ پور دے وسنیک شاہد خان نوں ہدائتاں دیندا سی۔ اجے نے اوہناں نوں جعلی اکاؤنٹ بناؤناں تے دوجیاں دے اکاؤنٹاں وچوں پیسہ اپنے اکاؤنٹ وچ لیاؤنا سکھایا۔ اجے دے ہیکنگ لئی ورتے جاون والے سنداں وچ اوہدا لیپ ٹاپ کمپیوٹر، کمیونیکیٹر تے موبائل فون رلتی نیں پر پولیس دا آکھنا ہے کہ اوہنے آپنے فراڈاں دا کوئی کھرا پچھے نہیں چھڈیا۔
اجے دا رابطہ آن لائن فراڈیاں نال انٹرنیٹ تے کھیڈدیاں ہویا تے فیر اوہنے چھیتی ای فراڈ کرنا سکھ لیا۔ اوہنے پولیس نوں دسیا ہے کہ عالمی ہیکراں نال سلام دعا ہوون مگروں اوہ روز پندراں پندراں گھنٹے انٹرنیٹ تے بیٹھدا سی تے سکھدا سی کہ ایہہ کم کیویں ہندا ہے۔ اوہدے کول پوری دنیا وچ 4000 بندیاں دے کریڈٹ کارڈ نمبر تے اوہناں دی لوڑیندی جانکاری ہے۔ اوہ سائبر پولیس دیاں اکھاں وچ گھٹا پاؤن لئی پراکسی سرور ورتدا سی۔
