کاراں بناؤن والی کمپنی ہونڈا نے ہائیڈروجن جیہڑا کہ پانی دا مُڈھلا عنصر ہے نال چلن والی پہلی کار دی کمرشل پیداوار شروع کر دتی ہے۔ ایس کار وچوں کسے قسم دی کوئی گیس نہیں نکلے گی۔ چار سیٹاں والی ایہہ گڈی جیہدا ناں 'ایس سی ایکس کلیرٹی' ہووے گا، ہائیڈروجن گیس تے بجلی نال چلے گی تے ایہدے وچوں اُکا بھاپ نکلے گی۔
ہونڈا نے ایہہ دعویٰ کیتا ہے کہ ایہہ نویں گڈی، پیٹرول یاں ڈیزل نال چلن والیاں عام گڈیاں نالوں تن گنا گھٹ خرچہ کرے گی۔ پہلوں ہونڈا دو سو گڈیاں بناوے گی جیہڑیاں اگلے تن ورھیاں وچ لیز تے لبھن گیاں۔ امریکی اداکارہ جیمی لی کرٹس ایس گڈی نوں لین والیاں وچ ہوون گیاں۔ ایہہ گڈی جولائی توں کیلیفورنیا وچ اتے ایس ورھے دے اخیر تے جاپان وچ وی لبھے گی۔
ہونڈا کمپنی دا آکھنا ہے کہ اوہ امریکہ تے جاپان وچ ایس ورھے انج دیاں کجھ درجن کاراں جدوں کہ اگلے تن ورھیاں وچ انج دیاں دو سو گڈیاں بنا لوے گی۔ ایہہ گڈی چھ سو ڈالر مہینے لئی لیز تے ملے گی۔
