اس گل اتے ذرا وی یقین نہ کرو کہ ککڑ تہاڈے لئی ودھیا خوراک ہے اتے جے تہانوں ناڑیاں جام ہون دی جاں دل دی بیماری ہے اتے تسیں میٹ کھانا وی چھڈنا نہیں چاہندے تاں چکن کھائی چلو۔
ککڑ دے وپار وچ لگاتار ایہہ کھوج ہندی رہندی ہے کہ چوچیاں نوں کیویں موٹے تے بھارے بنایا جاوے تاں جو بوہتے پیسے وٹے جا سکن۔ ککڑی ککڑ نوں موٹے کرن لئی اوہناں نوں موٹے کرن والے سستے گھٹیا کاربوہائیڈریٹ اتے گتے دے گتاوے کھوائے جاندے ہن۔ ایتھوں تک کہ اوہناں نوں پتھر دا چونا وی کھوآیا جاندا ہے۔ اس خیال نال کہ ایہہ سبھ کجھ اوہناں نوں ہضم ہو جاوے، اوناں نوں اینٹی بائیوٹک، سلفا دوائیاں، ہارمون اتے نٹروفورن کھوائے جاندے ہن۔ ٩٠ فیصدی بھارتی ککڑ یاں نوں سنکھیا رلیاں دوائیاں کھوائیاں جاندیاں ہن۔ دو دوائیاں دی وکری اُتے پابندی ہے کیونکہ اوہ کینسر دا کارن بندیاں ہن پر مرغی خانیاں والے اوہ دوائیاں وی ککڑیاں نوں کھلاؤندے ہن تاں جو آنڈیاں دی زردی گوڑھی ہو جاوے۔ بھارتی ککڑ ی کاروبار نال جُڑیا اک رسالہ لکھدا ہے کہ اینٹی بائیوٹک دوائیاں توں بناں ککڑی کاروبار چل نہیں سکدا۔ ککڑ یاں نوں کیہڑی خوراک کھوائی جاندی ہے؟
گتا، ککڑ یاں دیاں آپنیاں سکیاں بٹھاں، اُلی لگی مکی (جس نوں بندے نہیں کھا سکدے، ایسے کرکے اوہ سستی مل جاندی ہے) مچھیاں اتے بچڑخانیاں دی رہند کھوہند، کھنبھ، نقلی وٹامن، کھنج وستاں (سنگ مرمر دیاں کاناں وچوں نکلیا سنگ مرمر دا چورا) اینٹی بائیوٹک اتے کیڑے مار دوائیاں وغیرہ۔ اس ساری سواہ کھیہہ نوں کینسر پیدا کرن والی جینشین وائیولیٹ (اک کوڑی پہاڑی بوٹی) نال ملایا جاندا ہے۔
کیہ تہانوں چکن جاں آنڈے دا سواد چنگا لگدا ہے؟ پر اس آنڈے دی زردی نہ تاں ککڑی نے بنائی ہے اتے نہ ہی قدرت نے۔ ایہہ زردی اک ککڑی نوں دتیاں گئیاں زینتھوفل تے زینتھن دوائیاں، میری گولڈ ڈائی اتے کیروٹینک تیزاب نے بنائی ہے۔ اس کارن اک ککڑی دی جسمانی حالت کیہ ہندی ہے؟ ککڑیاں تھکاوٹ، انھے پن، خراب گردے، کمزور ہڈیاں تے پٹھے، ادھرنگ، اندر خون گرنا، انیمیا (بھس روگ) اتے جوڑاں وچ درد ورگیاں بیماریاں دا شکار ہو جاندیاں ہن۔ اوہناں دے دل وچ لہو دیاں گلٹیاں بن جاندیاں ہن اتے پنچھی ہارٹ اٹیک نال مر جاندے ہن۔ پنچھی ہوا وچ اڈدا ہے، چیک ماردا ہے اتے دھڑم کرکے بے جان زمین اتے ڈگ پیندا ہے۔ رسالہ پولٹری ڈائیجیسٹ لکھدا ہے، اس بیماری نوں فلپوور سنڈروم کہندے ہن جو ککڑیاں نوں عام ہو جاندی ہے۔
اس طرحاں دے بیمار پنچھی وی دوکاندار گاہکاں نوں ویچ دیندے ہن۔ پنچھی دے پنڈے تے کھنبھ نہ ہون دے برابر ہندے ہن۔ رگڑ لگدی رہن کرکے اوس دا پنڈا لال دسدا ہے۔ بوہتے چوچیاں نوں چکن کینسر ہندا ہے، جس نوں لیوکوسس کہندے ہن۔ اک وار جانچ ہوئی تاں پولٹریاں دے ٩٠ فیصدی چوچے اس بیماری دا شکار نکلے۔ بھارت وچ مرغیاں نوں عام طور تے ہیضہ ہو جاندا ہے۔ جدوں تسیں چکن کھاندے ہو تاں اس طرح دیاں بیماریاں تہاڈے پنڈے وچ چلیاں جاندیاں ہن۔ برڈ فلو دیاں ان گنت قسماں ہن پر مرغیاں نوں ست قسماں دا برڈ فلو ہندا ہے۔ برڈ فلو دی کوئی نہ کوئی بیماری ہر ویلے مرغیاں نوں ہندی رہندی ہے۔
جدوں تسیں اک بیمار پنچھی دا گوشت کھا لیندے ہو تاں تہاڈے پندے نال کیہ واپردا ہے؟ تسیں جو کھاندے ہو، اوہ میٹ نہیں ہندا، اصل وچ اوہ بے حد خطرناک دوائیاں دی پوٹلی ہندی ہے۔ جدوں ککڑ دے گوشت راہیں اینٹی بائیوٹک دوائیاں دے تت تہاڈے جسم وچ چلے جاندے ہن اتے تسیں بیمار ہو جاندے ہو، تاں کوئی ہور اینٹی بائیوٹک دوائی تہاڈے اتے اثر نہیں کرے گی۔ ورلڈ ہیلتھ آرگنائزیشن (ڈبلو. ایچ. او.) نے انسانی موتاں بارے رپورٹاں چھاپیاں ہن۔ ایہناں رپورٹاں موجب کجھ موتاں دا کارن، اینٹی بائیوٹک دوائیاں دا اثر نہ ہونا سی کیونکہ ککڑ دے گوشت راہیں اوہناں دے پنڈے وچ پہلاں ہی بہت زیادہ اینٹی بائیوٹک تت موجود سن۔ دنیا وچ جنیاں وی اینٹی بائیوٹک دوائیاں بندیاں ہن، اوہناں وچوں ادھیاں ککڑیاں نوں کھوائیاں جاندیاں ہن۔ پینسلین اتے ٹیٹراسائیکلین تاں عام ہی ککڑیاں نوں دتیاں جاندیاں ہن۔
ہور کہڑیاں دوائیاں ککڑیاں نوں دتیاں جاندیاں ہن؟ سلفانامائیڈ، جیہڑی ماس وچ ٹکی رہندی ہے۔ ڈمٹریڈازول، جس توں کینسر ہون دا ڈر ہندا ہے۔ بینزیمیڈازول ایہہ وی کینسر کردی ہے۔ ککڑیاں دا تیزی نال بھار ودھاؤن لئی اوہناں نوں آئیونوفورس دتی جاندی ہے۔ اوہناں نوں پروبائیوٹکس دوائیاں کھوائیاں جاندیاں ہن، تاں جو اوہناں نوں جو سواہ کھیہہ کھوائی جاندی ہے، اوہ ہضم ہو جاوے۔ چوچیاں دے چھیتی چھیتی ودھن پھلن لئی اوہناں نوں زیرانول، ٹیسٹوسٹیرون، پروجیسٹیرون اتے ایسٹراڈیول دوائیاں کھوائیاں جاندیاں ہن۔ آنڈا صنعت دے مالک مرغیاں دی خوراک وچ اینٹیوکسیڈینٹ تت ملا دیندے ہن، تاں جو اوہناں دا اک ویلے، آنڈے دین دا ویلا لما ہو جاوے۔
چوچیاں دے چھیتی ودھن پھلن لئی اتے بوہتے آنڈے لین لئی ککڑیاں نوں سنکھیا رلیاں دوائیاں کھوائیاں جاندیاں ہن۔ کلورمفینیکول جو بندیاں لئی زہریلی ہندی ہے کیونکہ اس دا سانگا کینسر اتے جماندرو روگاں نال ہندا ہے، مرغیاں دی خوراک وچ ملائی جاندی ہے، تاں اوہناں وچ بیماری دا مقابلہ کرن دی طاقت ودھ جائے۔ ککڑیاں نوں خوراک راہیں جاں ٹیکیاں راہیں دتیاں جاندیاں دوائیاں وچ اوکسیٹیٹراسائیکلین، ڈیکسامیتھازون، لنکومائیسین، فینلبوٹازون (دماغی بوجھ دور کرن لئی) ایمینو ایسڈ سلیوشن، سپیکٹینومائیسین، اموکسی سیلن، ایمپرولیم، لیوامائیسول، پوٹاشیم پینسیلین، ٹائیلوسین، ٹرمتھوپرم شامل ہن۔ ایہناں دوائیاں وچوں بوہتیاں کینسر کرن والیاں ہندیاں ہن اتے اوہناں دے لیبل اتے لکھیا ہندا ہے، بہت گھٹ ورتوں لئی، پر پولٹری مالکاں نوں کون دیکھدا ہے؟ خوراک اتے دوائیاں دی چیکنگ کرن والے محکمے نے اک عام چیکنگ وچ دیکھیا کہ ککڑ دے گوشت وچ ١٤٣ نقصان دہ اتے خطرناک دوائیاں دے تت شامل ہن۔ اس رپورٹ موجب، ایہناں وچوں ٤٢ دوائیاں کینسر کردیاں ہن جاں اوہناں توں کینسر ہون دا خطرہ ہندا ہے۔ ٢٠ دوائیاں کارن جماندرو روگ ہو سکدے ہن اتے ٦ دوائیاں پنڈے دے انگ ونگے ٹیڈھے کر دیندیاں ہن۔
کیہ خوراک انسپکٹر نوں ایہناں دوائیاں دے ناواں دا پتہ ہے جاں اوہ اُکا کدی کدائیں آؤندا ہے، رشوت لیندا ہے تے ایہہ لکھ کے چلا جاندا ہے کہ اس فیکٹری دا کم ٹھیک ٹھاک ہے۔ کینسر نال مریا کوئی وی ککڑ سٹیا نہیں جاندا، تہانوں ویچیا جاندا ہے۔ صرف اینا ہی نہیں، تسیں بھیانک کیڑے مار دوائیاں وی کھا جاندے ہو، کیونکہ مرغی خانیاں وچ مکھیاں اتے کیڑے مکوڑے عام ہندے ہن، اوناں نوں مارن لئی کیڑے مار دوائیاں چھڑکیاں جاندیاں ہن۔ کیڑے مار دوائیاں ککڑ ککڑیاں دی چمڑی وچ دھس جاندیاں ہن، جنہاں نوں تسیں گوشت دے نال ہی چھک جاندے ہو۔ ڈی. ڈی. ٹی. اتے دنیا بھر وچ پابندی لگی ہوئی ہے پر مرغی خانیاں وچ اس دی عام ورتوں کیتی جاندی ہے۔
کیہ ایتھے ہی بس ہے؟ نہیں، جنوراں دے گردیاں اتے جگر وچ بھارے کھنج تت پائے جاندے ہن جویں کیڈمیم، سکہ اتے سنکھیئے دے تت۔ ایہہ سبھ کجھ تہاڈے پنڈے وچ جاندا ہے، نویں پولٹری مالک آپنیاں گندیاں اتے خطرناک عادتاں توں کدی باز نہیں آؤن گے۔ اوہ دوائیاں (ڈرگز) دی پوجا کردے ہن کیونکہ دوائیاں ساریاں اوکڑاں دا حل ہن۔ دوائیاں، پولٹری مالکاں لئی اوکڑاں دا حل ہو سکدیاں ہن پر لوکاں اتے جانوراں لئی اوہ بھیانک بیماریاں دا کارن بندیاں ہن۔ دوائیاں دا شکار ککڑ نہیں، تسیں آپ بندے ہو۔ دنیا دا سبھ توں خطرناک وپاری ہیروئن سمگلر نہیں، پولٹری مالک ہے۔
