نویں کاہڈ توں مگروں سائنس داناں نے آکھیا جو ہرتیجے بندے وچ کجھ انج دے جینیات ہوندے ہین جیہڑے دل دی بماری نوں روکن وچ کم آوندے ہین۔اک لکھ سنتالی ہزار مریضاں نوں پرکھن توں مگروں ایہہ گل کھلی ہے جوCETP جینز دے کجھ نمونے انج دے ہوندے ہین جیہڑے ناں دے ' چنگے کولیسٹرول ' دی سطح ودھاوندے ہین۔
برطانیہ تے ڈچ کاہڈاں دی ایہہ کاہڈ جیہڑی ' امریکن ایسوسی ایشن جرنل وچ چھپی ہوئی ہے۔ دسا گیا ہے جو انج دے جینز نال دل دادورہ پین دی شرح پنج فی صد گھٹی ہے۔
یونیورسٹی وچ کالج لندن وچ جینٹیکس دی لیکچرر ڈاکٹر ارون ہنگورانی دا کہنا ہے جو ایس کاہڈ نال جیہڑی گل بات پتہ گی ہے ایس نال بماری دے کارن تے اثراں نوں سمجھن وچ مدد ملدی ہے تے جدوں ایہہ گل سمجھ لگ جاوے تے چنگیاں دوائیاں بنایا جاسکدیاں ہین جیس نال ایس دا پربندھ ہوسکے۔
اک برطانوی ماہر جینیات دا کہنا ہے کو ایس کاہڈ توں مگروں دوائیاں نال کئی لوکاں نوں فیدا ہو سکدا ہے۔ سائنس دان ایہہ تے پہلوں ہی دس چکے ہین جو خون دے نظام وچ ' خراب کولیسٹرول ' دی پدھر وچ کمی نال دل نوں محفوظ رکھیا جاسکدا ہے۔
ایس کاہڈ نال برطانیہ دی کیمرج تے نیو کاسل یونیورسٹیز جدوں کہ ہالینڈ دی گروننجن یونیورسٹی دیاں ٹیماں نے سارے جگ وچ اک لکھ سنتالی بندیاں تے کیتے گئے اپنے اک سو مشاہدیاں نوں کٹھا کیتا ہے۔
ایس کاہڈ وچ CETP جینز دیاں چھ وکھریاں شکلاں وچوں اک دے اثراں بارے پڑچول کیتی گئی ہے۔پروفیسر جان ڈینش جیہڑے ایس کاہڈ دے سرپرست ہین، اوہناں دا کہنا ہے جو نویں سٹڈی ایس خیال نوں پکیاں کرے گی جیس ہیٹھ کہیا جارہیاسی جو ' ایچ ڈی ایل کولیسٹرول ' دی پدھر نوںودھا کے دل دی بماری نوں روکیا جاسکدا ہے۔انج کجھ دوائیاں نال ہی ہوسکدا ہے جیہڑی CETP نوں روکدی ہے۔
چیتے رہوے کہ سن دوہزار چھ وچ ' ایچ ڈی ایل کولیسٹرول ' دی پدھر ودھاون والی دوائیاں دا تجربہ اُس ویلے مکایا گیا سی جدوں دل دا دورہ پین نال تے ایس دے کارن موتاں دی شرح ودھ گئی سی۔ ' برٹش ہارٹ فاؤنڈیشن ' دے پروفیسر پیٹر ویسبرگ دا کہنا ہے جو ایس سٹڈی دے فیدے تے ہوسکدے ہین پر ہن وی ایس ولوں ہور پن چھان دی لوڑ ہے تاں جو ایہہ متھیا جا سکے جو ایس نال ہور کنے فیدے مند نتیجے لبھ سکدے ہین۔
