اک نویں کاہڈ موجب نشاستے دار یعنی کاربوہائیڈریٹ غذا دا بنیا تگڑا ناشتہ وزن گھٹ کرن وچ فیدے مند ہوندا ہے، کاہڈ توں پتہ لگیا ہے جو اوہ زنانیاں جیہڑیاں سارا دیہاڑی دیاں کیلوزیز دا ادھا حصہ سویرے ناشتے وچ ورت لیندیاں ہین، اوہناں نوں انج دیاں زنانیاں دے مقابلے وچ وزن گھٹاون وچ بوہتی کامیابی ہوندی ہے جیہڑیاں ماڑا موٹا ناشتہ کردیاں ہین۔ ہور ایہہ کہ اوہناں دا وزن پھیر سوکھیاں نہیں ودھدا۔
وینزویلا وچ ہوون والی کاہڈ دی پردھان ڈاکٹر ڈینئیلا جیکبو وچ کہندیاں ہین جو تسیں ماڑا جیہا ناشتہ کردے ہو تے سارا دن تہانوں ناشتے دی طلب رہندی ہے جیس کارن تسیں سارا دن کجھ نہ کجھ کھاندے رہندے او تے ایس نال میٹابولزم وی سست پے جاندا ہے۔
خیال کیتا جارہیا ہے جو نشاستے تے پروٹین دے بنے ناشتے نال سارا دیہاڑی مٹھیاں شیواں نوں دل نہیں کردا تے نال نال بندے دا میٹابولزم بوہت تیز ہوجاندا ہے۔ سائنسداناں نے اپنی کاہڈ وچ تگڑے ناشتے والی خوراک دا مقابلہ گھٹ نشاستے والی خواک نال کیتا۔ جیکبووچ تے ورجینیا کامن ویلتھ یونیورسٹی نے چورانوے موٹیاں زنانیاں دا مشاہدہ کیتا تے ایہہ ویکھیا کہ گھٹ نشاستے والیاں غذاواں کھاون نال جتھے نے مڈھ وچ وزن گھٹایا پر ایس دا بوہتا حصہ واپس آگیا۔
گھٹ نشاستے دار غذا کھاون والیاں زنانیاں نے اوسطا اٹھائی پاونڈ گھٹ کیتا جدوں کہ بھاری ناشتہ کرن والیاں نے تئی پاونڈ گھٹ کیتا۔ پر اٹھ مہینیاں مگروں گھٹ نشاستے والیاں زنانیاں نے اٹھائی وچوں اٹھاراں پاؤنڈ پھیر کر لیے سی، جدوں کہ بھاری نشاستے والیاں زنانیاں وچ وزن وچ کمی جاری رہی تے اوہناں ہور ساڈھے سولاں پاؤنڈ وزن گھٹایا۔
ایس دا مطلب ایہہ ہویا جو کاہڈ دے مکن تے بھاری ناشتے والیاں زنانیاں نے کل رلا کے ساڈھے 39 پاؤنڈ وزن گھٹایا جدوں کہ گھٹ نشاستے والیاں زنانیاں دے وزن وچ بس دس پاؤنڈ کمی ہوئی۔
جیہڑیاں زنانیاں تگڑے ناشتے والے ٹولے وچ سن اوہناں دسیا جو اوہ دوپہر دے کھانے توں پہلوں اوہناں نوں گھٹ بھکھ لگدی سی تے اوہناں دا مٹھیاں شیواں کھاون نوں دل نہیں کردا سی۔
