بلھے شاہ نے نچ کے یار منایا سی اوس ویلے موبائل فون جو نہیں سی ہوندے۔ اجکل یار موبائل فون تے ای منا لئے جاندے نیں۔ پر جے تہاڈا یار رُس جاوے تے تسیں کسے پاپ سنگیت دے میلے وچ پھسے ہوئے ہوو تے تہاڈے فون دی بیٹری وی مُک گئی ہووے تے تسیں کیہ کرو گے؟ پریشان ہوون دی کوئی گل نہیں، تہاڈے لئی اک چنگی خبر ایہہ ہے کہ تسیں سنگیت سنو تے نچنا شروع کر دیو۔
اورنج ناں دی ٹیلی فون کمپنی نے دسیا ہے کہ اوہ اک الیکٹرانک کمپنی نال رل کے ایہو جہیا بیٹری چارجر بنا رہے نیں جیہڑا نچن نال فون دی بیٹری نوں چارج کر دیوے گا۔
ایہہ چارجر ایس سال تجربے دے طور تے دتا جاوے گا۔ اورنج کمپنی نے دسیا ہے کہ ایس چارجر دا بھار فون جنا ہووے گا تے سائز تاش دی ڈبی جنا۔ ایہہ چارجر بندہ اپنی بانہہ نال بنھے گا۔
اورنج برطانیہ دے بلارے دا آکھنا ہے کہ ''اسیں اک شغل کرنا چاہوندے آں۔ اسیں چاہوندے آں کہ لوک اپنے فون دی بیٹری چارج کردیاں دل پشوری کرن تے نالے نویں ٹیکنالوجی دا سواد لین''
