سائنس داناں دا کہنا ہے جو اویرین کینسر بڑا ہی خطرناک ہوندا ہے کیوں جو اوس دا چھیتی پتہ نہیں لگدا۔ جد اوس دا پتہ لگدا ہے تے اوہ اپنا کم کر چکیا ہوندا ہے تے مریض بچدا نہیں۔ پر ڈاکٹراں دی کاہڈ ہے جو کتے ایس نوں بہت پہلاں سُنگھ سکدے ہین۔
ایس توں پہلاں سائنس دان دوہزار چار وچ برٹش میڈیکل جرنل وچ ثابت کر چکے ہین جو کتے بندے دے پیشاپ توں مسانے دا کینسر سُنگ سکدے ہین۔ دوہزار چھ وچ اک رسالے ینٹگریٹو کینسر تھیریپی دی اک رپورٹ وچ دسیا گیا سی جو کیویں کتیاں نوں چھاتی تے پتے دے کینسر نوں سنگھیا جاوے۔
نویں کاہڈ وچ کاہڈیاں نے کتیا نوں سکھایا جو اوویرین کیسنر دیاں قسماں تے درجیاں دی کیویں کیویں پچھان کیتی جاوے۔ ایس توں پتہ لگیا ہے جو اویرین کینسر دی بو باقی دے پھوڑیاں وانگ ہی ہوندی ہے۔
کتیاں دی سُنگھنی بندیاں نالوں بہت ترکھی ہوندی آ۔ اوہ بمب، نشے دیاں شیواں تے زمین وچ دبیاں لاشاں وی سُنگھ لیندے نیں۔ جانور وچ حیران کرن والیاں اہلیتاں ہوندیاں نیں۔ اوہ اوہناں شیواں نوں سُنگھ لیندے ہین جنہاں نوں بندہ نہیں جان سکدا۔
