مائیگرین دے روگیاں لئی اک نواں آلہ بنایا گیا ہے جیہنوں ٹی ایم ایس دا ناں دتا گیا ہے۔ ایہہ آلہ مائیگرین دی لکھاں روگیاں دی مدد کرے گا۔ مائیگرین دے ہر پنج روگیاں وچوں اک روگی اورا توں متاثر ہوندا ہے۔ ایہہ دماغ وچ اک طرحاں دی برقی طوفان نال پیدا ہوون والے چانن دے جھماکے یاں ونگیاں ٹیڈھیاں لکیراں ہوندیاں ہین۔ اوریز مائیگرینز دے درد پیدا ہوون توں پہلوں آؤندے ہین۔ ٹی ایم ایس ناں دا ایہہ آلہ اورا دے شروع ہوون تے روگی دے سر دے نیڑے رکھیا جاندا ہے تے اوہ مقناطیسی میدان دیاں دو نکیاں لہراں دماغ نوں گھلدا ہے۔
ایس کاہڈ دے لکھاری البرٹ آئن سٹائن کالج آف میڈیسن دے ڈاکٹر رچرڈ لپٹن ہین۔ اوہناں نوں پک ہے کہ ایہہ لہراں اورا دے وچکار دماغ وچ پیدا ہوون والے برقی طوفان نوں روکدیاں نیں۔ اوہناں دا آکھنا ہے کہ ایہہ اک بڑے ڈاڈھے مقناطیس نوں چلا دیندا ہے جیہدے نال دماغ وچ تھوڑا جہیا کرنٹ پیدا ہوندا ہے جیہدے نال مائیگرین اورا بند ہو جاندا اے۔
ایس کاہڈ نے اوریز دے 200 روگیاں دی کھوج کیتی۔ ادھیاں نوں ٹی ایم ایس تے ادھیاں نوں اک کھڈونا دے دتا گیا۔ ٹی ایم ایس ورتن والے کئی لوکاں نے دسیا کہ دو گھنٹیاں مگروں اوہناں دی سر پیڑ مک گئی سی۔
سر پیڑ دی امریکی سوسائٹی دی کھوج توں پتہ لگا ہے کہ مائیگرین دے روگیاں وچوں ادھیاں نوں ای علاج نال لابھ ہوندا ہے۔ مائیگرینز پاروں امریکہ وچ ہوون والے کم دے کھوہ کھاتے پین دا گویڑ تیراں ارب ڈالر سالانہ توں ودھ ہے۔ عالمی ادارہ صحت موجب مائیگرینز مرداں دے مقابلے زنانیاں وچ دو توں تن گنا ودھ جدوں کہ گوریاں وچ افریقیاں تے ایشیائیاں دے مقابلے وچ بوہتی عام ہے۔
