سائنس داناں موجب ایس گل دے بوہت ثبوت ملے ہین جو زنانیاں وانگوں مرداں وچ وی ' بائیولوجیکل کلاک ' دا نظام ہے جیس دا کارن ودھدی عمر اوہناں دے پیو بنن دی خوبی تے اثر پاسکدی ہے۔ فرانس وچ بانجھ پن دا علاج کروان والے باراں ہزار توں بوہتے جوڑیاں تے کاہڈ نال ایہہ گل کھلی ہے جیہڑے مرد پینتی سال توں بوہتی عمر دے ہوندے ہین اوہناں توں کامیاب حمل ٹھہرن دے امکان گھٹ جاندے ہین۔ ایس کاہڈ موجب جے عمر چالی سالاں توں ودھ ہو جاوے تے حمل دے امکان ہور گھٹ جاندے ہین۔
کاہڈواں نے تولید ولوں یورپی ہیلتھ کانفرنس نوں دسیا ہے جو بوہتے امکان ایس گل دے ہین جو انج دا مادہ منویہ دا ڈی این اے کمزور پین تے ہوندا ہے۔ڈاکٹر سٹیفینی بیلاک جنہاں نے ایس ریسرچ نوں پیش کیتا ہے دا کہنا سی ایہہ ریسرچ انج دے لوکاں لئی بڑی اہم ہے جیہڑے فیملی شروع کرنا چاہندے ہین'۔
بانجھ پن دے علاج دی ماہر ڈاکٹر الانا پیسی دا کہنا ہے کئی طرحاں دی کاہڈاں توں انج دے بڑے ثبوت ملے ہین جیس نال پتہ لگدا ہے جو عمر ودھن دے نال پیدائش ولوں اوکھتاں توں مرد باہرے نہیں ہین۔ پہلوں وی فطری یاں آئی وی ایف طریقے راہیں اولاد لئی کوشش کرن والے انج دے جوڑیاں تے کاہڈ نال ایس گل دا پتہ چلیا سی جو چالی ورہیاں توں ودھ عمر دے مرداں نال جے حمل ٹھہر وی جاندا ہے تے کئی واری ضائع ہوون دا ڈر رہندا سی'۔
ڈاکٹر الانا موجب ایس ریسرچ نال ایہہ گل ہور پکی ہوجاندی ہے جو عمر دے نال نال مرداں وچ وی جمن ولوں گنجل پیدا ہوندے ہین۔'
