انٹرنیٹ دیاں وڈیاں کمپنیاں اک انج دا سافٹ لیا رہیاں ہین جیس راہیں انٹرنیٹ دے نظام وچ اک انج دے نقص نوں مکایا جاسکے گا جیس نال جعل ساز انٹرنیٹ ورتن والیاں نوں مالی نقصان اپڑا سکدے ہین۔
کمپیوٹر ماہراں نے چھ مہینے پہلوں انٹرنیٹ دے اک انج دے نقص دا پتہ لایا سی جیس ہیٹھ جے سرچ انجن وچ صحیح ایڈریس وی ٹائپ کیتا جاوے تے اوہ انٹرنیٹ ورتن والے نوں انج دی جعلی سائٹ تے لے جاندا ہے جتھے لوکاں دی ذاتی معلومات لے کے کریڈٹ کارڈ تے بینک اکاؤنٹ دی معلومات پتہ کرسکدے ہین۔
مائیکرو سافٹ سنے انٹرنیٹ دیاں وڈیاں کمپنیاں ہن ورتن والیاں نوں نویں سافٹ ویئر دے رہیاں ہین جیس ہیٹھ جعل ساز انٹرنیٹ ورتن والیاں نوں دھوکا نہیں دے سکن گے۔
مائیکروسافٹ دے اک اہلکار نے کہیا ہے انٹرنیٹ دے ایس نقص دے ساہمنے آون نال لوکاں نوں فکر مند ہوون دی لوڑ ہے پر گھابرن دی نہیں۔'
انٹرنیٹ دے ماہراں نے پتہ چلایا ہے جو ڈومین نیم سسٹم (ڈی این ایس) جیہدے وچ ویب سائٹ دا پتہ ٹائپ کیتا جاندا ہے اوہ ایڈریس نوں ہندسیاں وچ بدل دا ہے تے اوتھے ایڈریس نوں پٹھے پاسے موڑیا جاسکدا ہے۔
ماہراں موجب جعل ساز ایس نقص دا فیدا چک کے لوکاں نوں جعلی ویب سائٹاں تے کھڑ سکدے ہین جتھے دھوکے نال اوہناں دی ذاتی معلومات پچھ لئیاں جاندیاں ہین۔
مائیکروسافٹ سن تے سسکو ورگے کمپیوٹر دے وڈے اداریاں نے چھماہی پہلوں اک خفیہ ٹیم بنا دتی سی جنہے نواں سافٹ وئیر بنایا ہے۔ ایس سافٹ وئیر دی معلومات نوں حالی گجا رکھیا جارہیا ہے تاں جو وڈیاں کمپنیاں اپنے سسٹم نوں اپ ڈیٹ کر لین۔ ذاتی کمپیوٹر وچ ایس نقص نوں مکاون لئی انٹرنیٹ کمپنی کمپیوٹر نظام نوں آپوں اپ ڈیٹ کرن دی سوکھت دیوے گی۔
